ښاغلي بوچر وويل ناټو د طالبانو په ضد د هوايي پرځاى په ځمکنۍ جگړې کې دخلکو ژوند خوندي کولى شي

ښاغلي بوچر په روم کې د افغانستان په اړه د يوې نړيوالې غونډې په پاى کې وويل ناټو د خپلو ځواکونو لپاره د دې اجازې ترلاسه کولو ته اړتيا لري چې د وسله والو طالبانو په ضد ځمکنۍ جگړه پراخه کړي.

د المان، ايټاليا او فرانسې په گډون، د ناټو تړون ځينو غړو هېوادونو هغه غوښتنې رد کړې چې خپل ځواکونه د افغانستان په سويل کې هغو نارامو سيمو ته ولېږي چې طالبان پکې ډېر فعال دي.

خو ښاغلي بوچر وويل چې ټولو سيمو ته د افغان حکومت د واک غځولو لپاره هلې ځلې بايد چټکې شي.

په وروستيو اونيو کې د ناټو ځواکونو په پوځي عملياتو کې د ولسي خلکو د وژل کېدو لامله اندېښنې په زياتېدو دي.

متحد ايالات له پخوا راهيسې هڅه کوي چې د ناټو نور غړي هېوادونه قانع کړي چې د افغانستان په سويل کې د طالبانو په ضد جگړه کې زياته فعاله ونډه واخلي.

سره له دې چې د ناټو تړون ځواکونو اوس د سويل په گډون، په ټول افغانستان کې د نړيوالو ځواکونو قومانده په لاس کې اخيستې ده، خو د متحدو ايالاتو هيلې تر دې زياتې دي.

په نارامه سويل کې چې د طالبانو مرکز بلل کېږي ناټو ځواکونه د وسله والو د ځپلو لپاره زياتره له هوايي بريدونو کار اخلي چې په وروستيو کې يې ولسي خلکو ته پراخه مرگ ژوبله ور اړولې ده.