حنان حبىبزى له کابله

	د افغانستان په نړۍ کې تر ټولو زيات کوکنار توليدوي

ددغه وزارت يوۀ وياند خبريالانو ته وويل چې په روان کال کې به د ټول هيواد په کچه نژدې پنځوس زره هکټاره ځمکه د ترياکو له کښت څخه پاکه کړي . دا په داسې حال کې ده چې له ډيرى کروندو څخه توليد د ټوليدو په حال کې دى.

خو ددې سره سره وياند اعلان وکړ چې هغو ولايتونو ته به د ښې کاري ښودنې په نامه پيسې ورکړي که د نشه يي توکو د کښتونو په اړولو کې يي خلک مرسته وکړي .

زلمى افضلي په داسې حال کې خبريالانو ته د نشه يي توکو په وړاندې د افغان دولت مبارزه روښانه کوله چې د افغانستان په گوټ گوټ کې د ترياکو د کښتونو گلان په پړسيدو دي او د توليد ورکړې ته چمتو کيږي .

په سوېلي او لويديځو ولايتونو کې چې د گاونډي ايران له پولې سره څيرمه پراته دي د کوکنارو له کښتونو څخه د توليداتو ټولول وار له مخه پيل شوي دي .

دغه سيمې د افغانستان په کچه تر گردو زيات ترياک توليدوي .

ښاغلي افضلي وويل ناامنيو د نشه يي توکو قاچاق کونکو او سوداگرو ته دا لاره اواره کړې ده چې ددولت د مبارزې په وړاندې خنډونه راولاړ کړي .

ده وويل همدا لامل دى چې دوى لا په ټول هيواد کې د نشه يي توکو په وړاندې د بشپړې تگلارې د پلي کيدو ولکه نه ده تر لاسه کړې.

د طالبانو له ماتې وروسته د ترياکو کرکيله په افغانستان کې له ٨٠٠٠ هکټارو څخه ١٦٥٠٠٠ هکټارو ته رسيدلې ده .

افغان دولت هيله ښيي چې په روان کال کې نژدې پنځوس زره هکټاره مځکه د کوکنارو له کښت څخه پاکه کړي.

'زيان رسووونکى' اعلان  که د نشه يي توکو په وړاندې د مبارزې د کاري ډلو غړو ته د افغانستان په سوېل کې زيان ورسيږي لامل به يي دنړيوالو سوله ساتو ځواکونو همدا اعلان وي زلمى افضلي، د نشه يي توکو په وړاندې د مبارزې وزارت وياند

د نشه يي توکو په وړاندې د مبارزې افغان وزارت وويل چې په دې بهير کې يي نژدې ٢٥٠٠٠ هکټاره ځمکه د افغانستان په هغو ولايتونو کې چې امنيتي حالت په کې په پرتليز ډول ارامه دي له منځه وړې ده .

ده اعلان وکړ چي د هغو ولايتونو خلکو ته به د ښې کاري ښودنې په نامه پيسې ورکړي که خلک يي ددولت ددغه بهير ملاتړ وکړي.

د افغانستان د ترياکو له تولېد څخه هيروين جوړيږي چې د برتانيا د چارواکو په وينا د هغه هيواد په کوڅو کې د خرڅېدونکو نشه يي توکو ٩٠ په سلو کې برخه جوړوي .

هلمند په افغانستان کې هغه ولايت دى چيرته چې د نشه يي توکو کښت تر هر بل ځاى ډير کيږي او د اورپکو مخ په زياتيدونکو بريدونو د ولسمشر حامد کرزي د حکومت د واک د پراخيدو په وړاندې په دې ولايت کې خنډونه جوړ کړي دي .

په هلمند کې د برتانوي سرتيرو د لويې اډې په چاپيريال کې کروندگر د ترياکو د توليد پر ټولولو لگيا دي .هغه سرتيري چې هيواد يي په افغانستان کې د نشه يي توکو په وړاندې د مبارزې مشري په غاړه لري .

څو اونۍ وړاندې دغو سرتيرو رسنيو ته وويل چې د ترياکو له کښتونو سره دوى هيڅ کار نه لري .

د نشه يي توکو په وړاندې د مبارزې د افغان وزارت وياند وويل که د نشه يي توکو په وړاندې د مبارزې د کاري ډلو غړو ته د افغانستان په سوېل کې زيان ورسيږي لامل به يي دنړيوالو سوله ساتو ځواکونو همدا اعلان وي .

افغان دولت وايي چې نړيوالې ټولنې د نشه يي توکو په وړاندې د مبارزې د چټکولو لپاره له ژمنه کړو ٧٠ مليونه ډالرو څخه تر اوسه يوازې ٣٣ مليونه ډالر ور رسولي دي چې وايي بس نه دي .