محمود کوچى له کابله

	نړيوالې ټولنې او افغان حکومت په وار-وار ټينگار کړى چې کوکنار به په افغانستان کې ختموي

په سويلي ولايت هلمند کې يوې سيمه ييزې راډيو تېره ورځ هلته د مېشتو بهرنيو او افغان ځواکونو په استازيتوب داسې يو خبر خپور کړى و چې گواکې دوى د کوکنارو د اړوولو نيت نه لري او يوازې د سولې په راوستو کې له خلکو سره مرسته کوي .

تر دې مهاله په کابل کې دولتي چارواکو د خپور شوي اعلان په اړه ناخبري څرگندوله ، خو اوس د کورنيو چارو وزارت د نشه يي توکو پر وړاندې د مبارزې د برخې مشر جنرال داوود داوود وويل چې ناټو د دغه اعلان خپراوى يوه تکتيکي چاره بللې ده او ټينگار يې کړى چې بيا به داسې نه کيږي.

هغه وويل: (( د ناټو ځواکونه او د انگلستان هيواد په افغانستان کې د نشه يي توکو پر ضد يو له سترو مرسته کونکو څخه دى. هغوى د دغې چارې په هکله بخښنه غوښتې او ويلي يې دي چې دا يوه تکتيکي چاره ده او د بل ځل لپاره به نه تکراريږي . ))

تکتيکي چاره  ناټو ځواکونه اوانگلستان په افغانستان کې د نشه يي توکو پر ضد يو له سترو مرسته کونکو څخه دى. هغوى د دغې چارې په هکله بخښنه غوښتې او ويلي يې دي چې دا يوه تکتيکي چاره ده. جنرال داود، د کورنيو چارو مرستيال وزير

خو ښاغلي داوود دا څرگنده نه کړه چې د تکتيکي چارې نه يې موخه څه ده . بريتانوي ځواکونو لا له مخکې ويلي دي چې هيواد يې د نشه يي توکو پر وړاندې سخته مبارزه کوي خو کوکنار اړول د دوى د سرتېرو دنده نه ده .

ښاغلي داوود زياته کړه چې سږ کال يې د کندهار په ولايت کې څه د پاسه ٤٠٠٠٠ جريبه ځمکه له کوکنارو پاکه کړې خو دايې هم وويل چې په هلمند ولايت کې د کوکنارو کر د پخوا په پرتله څو ځلې زيات شوى دى .

دې لانجمنې شخړې داسې مهال سر پورته کړى چې د افغانستان په ډېرو سيمو کې بزگرانو د کوکنارو د کلني حاصل په ټولولو پيل کړى. داسې هم ويل کيږي چې په هلمند ولايت کې تر دې کچې کوکنار کرل شوي چې د نشتر وهلو لپاره يې اوس مهال کارگران نه موندل کيږي . او ښايي تر دې وروسته د کوکنارو اړول کومه گټه هم و نه لري .