اسدالله جلالزى له غزني څخه

	دا لا معلومه نه ده چې په پېښه کې ښکېله چورلکه د کومې ملکي قراردادي موسسې وه

د چارواکو او ايتلاف په وينا په دغې الوتکې کې د يوۀ افغان په گډون پنځه کسان سپارۀ و چې پر مځکه له ناستې سره سم پرې د دوى په وينا غليم د سپکو وسلو بريد کړى دى .

د چورلکې ټولې سپرلۍ د چارواکو او ايتلاف په وينا روغې رمټې دي .

په افغانتسان کې د نړيوالو ځواکونو يوۀ وياند جگړن ميچل بي بي سي ته وويل په سيمه کې نړيوال ځانگړي ځواکونه و چې د دۀ په وينا پر غليم بريد وکړي .

د جگړن ميچل په خبره د دغه بريد له امله د ( غليم ) درې کسان وژل شوي او نور يې تېښتي ته اړ وتي دي .

د غزني والي معراج الدين پټان له بي بي سي سره په خبرو کې بريد د وسله والو طالبانو له خوا وبالۀ او زياته يې کړه چې د طالبانو څلور کسان وژل شوي دي .

د غزني په والايت کې ځايي امنيتي چارواکو له بي بي سي سره په خبرو کې د خرابې شوې الوتکې د ويجاړولو يادونه هم وکړه .

دوى وويل چې نړيوال ايتلاف پر خرابې شوې الوتکې بمباري وکړه او ويجاړه يې کړه .

په افغانستان کې ملکي قراردادي موسسې د بيا رغاونې اوو د ځينو شرکتونو د امنيت ساتنې دندې پر مخ بيايي .

دا لا تر اوسه معلومه نه ده چې په پېښه کې د ښکېلي چورلکې موسسه په څه نامۀ وه او څه ډول کارونه يې پر مخ بېولل .