غزل اکمل کابل

	د امريکا په مشرۍ نړيوال ځواکونه وايي چې چورلکه د افغانستان په حکومت پورې اړه لري

دغه سيمه د کابل د جنوب په ١٥٠ کيلو مترۍ کي پرته ده.

د ايتلافي ځواکونو د وياند تام کالينس په وينا په دغه پيښه کې د چورلکې د دريو کارکوونکو په گډون ټول سپاره کسان وژل شوي د ي:

(( زموږ د معلوماتو له مخې په دغه چورلکه کې د بيلابيلو هيوادونو ١٦ تنه سپاره و، چې ټول وژل شوي دي. تراوسه د ١٢ تنو مړي موندل شوي او د نورو مړو لپاره لټون روان دى. خو سيمه غرنۍ ده او ز موږ د پلټنو هڅې يې له زياتو ستونزو سره مخامخ کړي دي)).

د چورلکې د دريو کارکوونکو په گډون ټول سپاره کسان وژل شوي د ي ايتلافي ځواکونو وياند تام کالينس

په وژل شويو کسانو کې لږ ترلږه د امريکې دوه ملکي وگړي ، د هالنډ دوه پوځي افسران او پاتى نور يې د بيلابيلو هيوادونو کارکوونکي وو.

ويل کېږي چي وژل شوي دواړه هالنډي پوځيان خوست ته د بيارغولو د پروژو او د امنيتي حالاتو د څيړلو لپاره تللي وو.

هالڼد په افغانستان کې د سوله ساتو ځواکونو په چوکاټ کې تر ١٥٠٠ زيات پوځيان لري، ددوى زياته برخه د ناټو تر وزر لاندې په ارزگان کې امنيتي دندې ترسره کوي او يا په شمال کې د ولايتي بيا رغاونې ډلو مشري کوي.

د امريکا په مشرۍ نړيوال ځواکونه وايي چې چورلکه د افغانستان په حکومت پورې اړه لري او د يوه خصوصي شرکت له خوا د مالونو د وړلو – راوړلو لپاره کرايه شوې وه.

د الوتکې د غورځېدو په سيمه کې د نړيوالو او افغان چارواکو پلټنې روانې دي، خو په رسمي ډول د هغې د غورځېدو علت نه دى ښودل شوى. په همدې ترڅ کې يوه طالب وياتد – محمد حنيف خبري آژانسونو ته د هغې د ويشتلو ادعا کړې ده.