ميرويس افغان له کندهاره

	ځايي خلک وايي چورلکې دوه څرخونه لرل ، عمومآ دا د چينوک ډوله چورلکو نخښه وي

څه دپاسه يوساعت دكابل كندهار لويه لاره دموټرو دتګ راتګ پر مخ دناټو پوځيانو بنده كړې وه ، كه څه هم چورلكه دكابل كندهار پرلويه لار سړك ته نژدې رانسكوره شوې خو ځايي خلكو وژل شوي يا ژوبل شوي پوځيان نه دي ليدلي .

له بگرام څخه په خپرې شوې يوې خبر پاڼې کې د چورلکې د رالويدو دليل د ماشين خرابي ښوول شوې ده .

خبر پاڼه وايي چې په دغې سي ايچ ٤٧ ډوله چورلکې کې ټول ٢٢ کسان سپارۀ و. د سپرو له ډلې ٨ وژل شوي او پاتې ١٤ کسان يې ټپيان دي .

خبر پاڼې له افغانانو غوښتي دي چې د چورلکې د لويدو سيمې ته دې نه ورنژدې کيږي چې د دوى په وينا دغلته د وسله والو طالبانو له شته والي خبر شوي دي . په بله وينا کيداى شي چې دغلته کومه نښته وشي .

که څه هم نړيوال ايتلاف د چورلکې د رالويدو دقيق ځاى نه ښيي خو ځايي خلک وايي چې دغه چورلکه د زابل ولايت د شاجوى په ولسوالۍ کې نسکوره شوې ده .

وسله والو طالبان دا ادعا کړې ده چې گواکې د دوى د توغنديو په گوزار دغه چورلکه لويدلې ده . وسله والو طالبانو پخوا هم تل د رالويدلو چورلکو د نسکورلو دعوه کړې ده.

د ځايي خلکو په وينا چورلکه له نسکوريدو وروسته دوه ځايه شوې خو اور نه دى پرې بل شوى .

دوى دغه پېښه د حسن کاريز په سيمه کې بولي ،او دا هغه ځاى دى چې د طالبانو له نسکوريدو راهيسته پکې تل نښتې او تاوتريخوالى شوى دى .