امريکايي پوځي ويانده وايي د چينوک ډوله چورلکې د نسکوريدو علتونه پلټي خو د دې په وينا د غليم له خوا دغه چورلکه نه ده نسکوره شوې .

د متحدو ايالاتو يوې پوځي وياندې وويل دا لا معلومه نه ده چې ولې دغه چورلکه نسکوره شوې خو دې د هوا حالت او په لوړ غرۀ د چورلکې د کښېناستو دلايل ورکړل .

د طالبانو له لورې دعوه شوې ده چې دوى دغه چورلکه په (( نويو وسلو )) رانسکوره کړې چې د دوى له ادعاو سره سم يې په دې وروستيو کې ترلاسه کړي دي .

د محتدو ايالاتو پوځ سملاسي د طالبانو ادعا رد کړه او ويې ويل چې دغه چورلکه د غليم په گولۍ نه ده لگيدلې يا لويدلې .

رپوټونه ښيي چې دغه چورلکه د څوکۍ په ولسوالۍ کې لويدلې چې د کونړ له مرکز څخه سويل پلو ته پرته ده .

تير کال په کونړ کې د متحدو ايالاتو يوه بله چورلکه د طالبانو په يوۀ بريد کې لويدلې وه چې ١٦ کسان پکې وژل شوي وو .