عبد المالک عاصم له کابله

	م.م وايي اجمل ازاد خبريال دى او له دولت ىا کورنيواو بهرنيو ځواکونو سره هېڅ تړاو نه لري

يوناما له طالبانو وغوښتل چې دغه ازاد خبريال سمدلاسه خوشي کړي . دغه خبريال شاوخوا درې اوونۍ وړاندې له ايټالوي خبريال ډانيل او دهغه له چلوونکي سره يوځاى د نا ارامه ولايت هلمند دنادعلي په ولسوالى کې وتښتول شو.

په کابل کې د يوناما يوۀ وياند صديق عليم يوې خبري ناستې ته وويل چې په دغه هېواد کې دې د خبريالانو کار ته له هرډول لاسوهنې او ځورونې پرته درناوى وشي .

ويل کيږي چې دافغانستان په بيلا بيلو سمېو کې خبريالان له يو لړ ننگونو او گواښونو سره مخامخ دي .

ښاغلي عليم ټينگار وکړ چې د طالبانو په بند کې پروت اجمل ازاد خبريال دى او له دولت ، کورنيواو بهرنيو ځواکونو سره هېڅ تړاو نه لري .

ده ژمنه وکړه چې ملگري ملتونه به دافغان دولت او د اجمل د کورنۍ په خواکې دهغه د خوشي کېدو لپاره هڅې او له نژدې ددغې پېښې څارنه وکړي .

تردې وړاندې يو شمېر افغان چارواکو ددغه خبريال دراخوشي کيدو دهڅو يادونه کړې وه .

دافغانستان په گوټ-گوټ کې خبريالانو د غونډو په کولو سره د اجمل له تښتوونکو دهغه د راخوشي کيدو غوښتنې کړې ، خو تر دې گړۍ طالبانو په روښانه توگه نه دي ويلي چې دغه افغان خبريال ونه خوشي کوي او يا ېې په وړاندې څه غوښتنه لري .

ښاغلى نقشبندي تېر کال د کب په ١٤ له ايټالوي خبريال ډانيل سره يوځاى ونيول شو چې ايټالوى بيا وروسته له بند څخه د پنځو طالب مشرانو د خوشې کولو په بدل کې ازاد شو.