آرش پاکطين له کابله

	ونس قانوني وايي د ملي پخلاينې غوښتنه شوې او له هغه سره دى موافق دى.

نوموړي چې د ښځو د نړيوالې ورځې په غونډې کې خبرې کولې وويل دا يي دنده چې د ولسي جرگې د مشر په توگه له تصويب شوي منشور څخه دفاع وکړي. نوموړي وويل په منشور کې هيڅ کله د دې غوښتنه نه ده شوې چې د چا حق دې بل چا ته وبښل شي بلکې د ملي پخلاينې غوښتنه شوې او له هغه سره دى موافق دى.

د ښځو د نړيوالې ورځې په غونډې کې د افغانستان د ښځو چارو وزارت وويل چې د نورو کلونو په پرتله تيرکال د ښځو پر وړاندې د تاوتريخوالي پيښې ډيرې وې.

په افغانستان کې د ښځو نړيواله ورځ په داسې مهال لمانځل کيږي چې د نورو کلونو په پرتله تير کال د ښځو پر وړاندې د تاوتريخوالي پيښې ډيرې بلل شوي دي.

د افغانستان د ښځو چارو وزارت وايي د نجونو تښتول، برمته کول،اجباري ودونه،وهل ټکول او امنيت نشتوالى هغه ستونزې وې چې تير کال په افغانستان کې ښځې ورسره مخامخې وې.سږ کال د ښځو د نړيوالې ورځې پيغام ( ښځه او ټولنيز امنيت) په نامه نومول شوى دى.

د ښځو د چارو وزارت په پيغام کې له ملگرو ملتونو او افغان حکومت غوښتل شوي چې د متبت او اغيزمنو بدلونونو په راوستو کې دې له دوى سره مرسته وکړي.

د افغانستان د ښځو چارو مرستيالې وزيرې مزاري صفا د ښځو پروړاندې د تاوتريخوالي په اړه وويل:

((د ښځو پر وړاندې د تاوتريخوالي پيښې د تيرکال په پرتله ډيرې دي چې لامل يې ښايې دغو پيښو ته د رسنيو نه لاس رسى وې. د تاوتريخوالو د ډيريدو بل لامل د ښځو بيوزلي ، نازده کړه او له ديني اړخه د هغوى د معلوماتو کموالى گڼل کيږي))

د ا فغانستان د ولسي جرگې مشر محمد يونس قانوني چې د ښځو د نړيوالې ورځې غونډې ته يې خبرې کولې وويل دوى هڅه کوي چې د ښځو د حقونو د خوندي کولو په موخه نوى قانون پلى کړي او په مخکينيو قوانينو کې به ځينې اصلاحات راولي.

(( موږ د افغانستان په مقننه قوې کې اوسيږو او افغان ښځو ته يو ژمنه لرو چې د نوي قانون په وضعه کولو او د مخکينيو قانونو په اصلا کولو به د ښځو په گټه خپل ملي وجيبه ادا کړو ))

ښاغلي قانوني يو ځل بيا خپل ملاتړ له هغه منشور څخه اعلان کړ چې څه موده وړاندې د ولسي جرگې له لوري تصويب شوى و او د توشيع لپاره ولسمشر حامد کرزي ته استول شوى دى.

د ملي پخلاينې له منشور څخه د ښاغلي قانوني يو ځل بيا ملاتړ په داسې وخت کيږي چې ولسمشر حامد کرزي د دغه منشور د څرنگوالي په اړه له علماو، کارپوهانو او د خلکو له استازو سره په خبرو اترو بوخت دى.

ښاغلي قانوني وويل د افغانستان ولسي جرگه داسې منشور تصويب کړى چې د اساسي قانون خلاف نه دى بلکې د ملي پخلاينې وړانديز کوي.

وړاندې د ولسمشرۍ د دفتر وياند کريم رحيمي هم ويلي و چې د خلکو له استازو سره د ولسمشر حامد کرزي خبرې اترې داسې ښيې چې خلک سولې،امنيت او د ملي پخلاينې غوښتونکي دي خو په دې شرط چې حق يې خوندي وي.

د افغانستان د ولسي جرگې له خوا د تصويب شوي منشور له مخې هغه کسان له عدلي تعقيبه معاف گڼل شوي چې د افغانستان د کورنيو جگړو پر مهال ښکيل و.