د پخوانۍ شمالي ټلوالې د قومندان او د بلخ د اوسني والي دريځ د نور افغان مشرتابۀ سره توپير لري

په دغو کسانو کې واليان ، د ولايتي جرگو غړي او فرهنگي شخصيتونه راټول شوي و . دوى ټولو د سيمې د امن او سوکالۍ لپاره د کيدونکې جرگې په باب د پوهاوي په غونډه کې برخه اخيستې وه .

د دغې جرگې د ترسره کيدو نېټه لا څرگنده نه ده خو تير کال په واشنگټن کې ولسمشر کرزي د ښاغليو بوش او مشرف سره په ناسته کې ياده کړې وه چې ټولو غاړو منلې وه .

د شمال د پخوانۍ ټلوالې مشهور قومندان او د بلخ اوسني والي عطا محمد نور ويل :

(( موږ بايد د ډيورنډ معما او ډرامې ته د پاى ټکى کيږدو . د همدې له لاسه هره ورځ زموږ بچي قرباني کيږي د دې مسالې په حل به افغانستان او پاکستان وکولى شي چې د گاونډيو په توگه سوله ييز ژوند سره وکړي . ))

ښاغلي نور زياته کړه افغانان بايد د دۀ په وينا عاقلانه فکر وکړي چې د ډيورنډ له پولې ها پلو له پاکستان څخه د خاورې ترلاسه کول عملي نه دي .

د بلخ د والي او د پخوانۍ شمالي ټلوالې د مشهور قومندان عطا محمد نور دغه څرگندونې د افغان مشرتابۀ له هغه دريځ سره توپير لري چې وايي د ډيورنډ د کرښې په باب هر ډول پريکړه د چارواکو ، ولسمشرانو او کابينې څخه پورته ده او يوازې د دغې کرښې دواړو غاړو ته پراتۀ خلک دا حق لري چې په باب يې پريکړه وکړي .

د ډيورنډ د کرښې تړون په ١٨٩٣ ميلادي کال کې د هغۀ وخت د برتانوي هند او د افغانستان د امير عبدالرحمن خان ترمنځ لاسليک شو چې د افغانستان د خاورې يوه برخه يې له هند سره يو ځاى کړه .

په ١٩٤٩م کال کې د افغانستان لويې جرگې دغه تړون اود برتانوي استعمار د وخت ټول تړونونه رد او لغو کړل . له هغې راهيسې ټولو افغانو واکمنو د ډيورند کرښه رد کړيده

خو په ١٩٤٧ ميلادي کال کې د هند له وېش او د پاکستان له جوړيدو سره دغه خاوره له پاکستان سره پاتې شوه .