ميرويس افغان له کندهاره

	د کندهار والي اسد الله خالد ادعا کوي چې نيول شوي دوه کسان پاکستانيان دي

چارواكي وايي چې دغو بريد كونكو هڅه كوله چې نن ( شنبې د مرغومي ٣٠ د جنوري ٢٠ ) په كندهار ښاركې عمليات ترسره كړي.

د كندهاروالي اسدالله خالد بي بي سي ته وويل چې دواړه ځانمرګي بريدكونكي د پاكستان د بلوچستان ايالت د پښين د ولسوالۍ اوسيدونكي دي .

د بريد كونكو نومونه يې رحمت الله او شمس الله يادكړل. اسدالله خالد په ټينګار سره وويل چې ترپلټنو ګرويږنو وروسته به دواړه ځانمرګي بريد كونكي د خبري رسنيو په وړاندي ودروي .

په كندهار كې افغان چارواكي د ځانمرګي بريد كونكو د نيول كيدو خبر په داسې حال كې وركوي چې تيره شپه په ارزګان ولايت كې د ځانمرګي بريد له كبله د ناټو پنځه سرتيري ټپيان شوي دي.

د كندهار په هوايي ډګر كې د ناټود ځواكونو پوځي ويانده تورنه يانيكا وايي چې په پيښه كې د ژوبل شويو پوځيانو روغتيايي حالت د ډاډ وړ دى.

د دغې پوځي وياندې په وينا چې ښايي پر پوځيانو يې د چاوديدونكو توكو بار موټر چاودلى وي.

خو افغان چارواكي دغه چاودنه د ځانمرګي بريد له كبله بولي او وايي چې تيره ورځ د اروزګان ولايت د مركز تيرينكوټ شمال لوري ته د سرمرغاب په سيمه كې د ناټو پرځواكونو ځانمرګى بريد شوى.

د كندهاروالي اسدالله خالد بي بي سي ته وويل چې دواړه ځانمرګي بريدكونكي د پاكستان د بلوچستان ايالت د پښين د ولسوالۍ اوسيدونكي دي .

كه څه هم ناټو د ټپي شويو پوځيانو هويت نه دى په ډاګه كړى خو په ارزګان ولايت کې ډيره برخه د هالنډ هيواد سرتيري د ناټو په ليكو كې په فعاليت بوخت دي.

قاري يوسف چې په سيمه كې د طالبانو وياند بلل كيږي د اروزګان ولايت د چوري ولسوالۍ د ولسوال د وژل كيدو خبر وركړ او ويې ويل چې د ريموټ كنټرول بم په وسيله يې دغه ولسوال له پنځو نورو امنيتي سرتيروسره يو ځاى وژلى دى .

د ارزګان چارواكي مني چې د چوري پر ولسوال د ريموټ كنټرول بم بريد شوى ، خو دوى د ټپي كيدو خبره کوي .

د سيمې ځينو اوسيدونكو ما ته وويل چې په پيښه كې د ولسوال په ګډون يو بل سرتيرى وژل شوى او څلور نور ټپيان دي .

دلته په كندهار كې د ژړۍ ولسوالۍ په سنګيسار سيمه كې هم د ناټو ځواكونو پر پوځي كاروان باندې يوه چاودنه وشوه.

په كندهار كې د ناټو ځواكونو پوځي قومنداني يوازې دا مني چې چاودنه شوې ، مرګ ژوبله نه لري او يو موټر يې زيامن شوى دى .

همدا راز د دغې پيښې په څېر له مرګ _ ژوبلې پرته نن سهار آيساف ځواكونو ته درې تيل وړونكي شخصي موټر د يوې چاودنې له كبله وسوځيدل .

دغه پېښه چې د كندهار سپين بولدك پر لويه لار شوې چې پړه يې طالبانوپه غاړه واخيسته.