اروزگان د افغانستان د ناکراره ولايتونو څخه دى

چارواکي وايي چې دا پيښه د جمعې په سهار هغه وخت وشوه چې يو مسافر وړونکى سرويس موټر د ١٧ تنو سپرليو سره د ارزگان مرکز ، تيرينکوټ ، ته نږدې پر يو ماين ولږيد

د ارزگان چارواکي وايي د موټر ټوله سپرلى غير پوځي خلک و چې د اختر له امله د خپلو خپلوانو د ليدلو لپاره تله

د ارزگان د والي وياند قيوم قيومي وويل پر ماين باندې د موټر د لگيدو او د ماين د چاودنې له امله ١٤ تنه ووژل شول او ٣ تنه نور ټپيان شول

ښاغلي قيومي وويل ددې پيښې په اړه پلټنې او تحقيقات پيل شويدي خو تراوسه نده معلومه چې دا د ليرې نه کنترول شوى بم و او که له مخکې ايښودل شوى ماين و

هغه وويل چې د سپرليو په منځ کې کوم حکومتي مامور نه و موجود

تراوسه پورې کومې ډلې ددې پيښې مسوليت پر غاړه ندى اخيستى

پدې وروستيو کې د افغانستان په جنوبي ولايت ارزگان کې د ناټو ځواکونو او دحکومت مخالفو وسله والو اورپکو ترمنځ نښتې شوې وې