طاهر خان له اسلام اباد څخه

	د پاکستان د کورنيو چارو وزير افتاب شيرپاو د درګۍ پېښه د باجوړ له هوايي بريد سره تړلې ده.

د پاکستان د پوځ د اطلاعاتو څانګې يا اى ايس پي آر په پېښه کې د ٤٢عسکرو د وژل کيدو تاييد کړى او دا يي يو ځان وژونکى بريد بللې.

پوځ وايي چې په موټر سائيکل سپور يو کس هغه وخت د عسکرو د قلعې ميدان ته ورننوت کله چې عسکر د سهار د معمول په ورزش بوخت وو.

د پاکستان د کورنيو چارو وزير افتاب شيرپاو د درګۍ پېښه د باجوړ له هوايي بريد سره تړلې ده.

ښاغلي شيرپاو وويل که چيرې د باجوړ بريد نه وو شوى نو احتمال وو چې دغه رنګې نور ځان وژونکي بريدونه ترسره شوى وو.

درګۍ کې بعضو عيني شاهدانو د ټيلي فون د لارې بي بي سي ته وويل چې د درګۍ د پوځي قلعې په ميدان کې يې له چاودنې وروسته مړي او ژوبل شوي کسان وليدل.

د بعضو عيني شاهدانو په وينا بريد د پنجاب رجمنټ ( غونډ ) په قلعه کې هغه وخت ترسره شو کله چې د سهار شاوخوا اته نيمې بجې عسکر په ورزش بوخت وو.

درګۍ کې ځايي ژورناليستان وايي چې په ژوبل شويو عسکرو کې د بعضو حالت ښه نه دى او دا امکان دى چې د مړو شمير زيات شي.

هغوي وويل چې سخت ټپي شوي عسکر د علاج لپاره پېښور ته منتقل کړ شوي او بعضې د درګۍ روغتون ته وړل شوي دي.

د چاودنې وروسته امنيتي ځواکونو د سوات او ملاکنډ ترمينځه لوى سړک د څه وخت لپاره وتاړه.

دا په درگۍ کې چې د صوبايي قبايلي سيمې ښارګوټى دى او له پېښوره شمال ختيځ پلو نژدې ٩٠ کيلومتره ليرې پرته سيمه ده ، د عسکرو په مرکز کې لومړنۍ چاودنه ده.

د پاکستان په قبايلي سيمو وزيرستان او باجوړ کې امنيتي ځواکونه او چارواکي په تيرو وختونو کې د بريدونو هدف ګرځيدلي دي. چارواکي د داسې حملو تور اکثره په اورپکو اچوي.

	دا په درگۍ کې د پاکستاني پوځ پر ضد لومړنى بريد و

د درګۍ چاودنه يو ورځ وروسته د هغې پېښې شوې ده چې تيره ورځ د صوبه سرحد د ګورنر علي جان اورکزي د جنوبي وزيرستان د سفر پرمهال ٢ راکټى وويشتلى شوې.

راکټې هغه وخت وويشتلې شوې کله چې ګورنر د جنوبي وزيرستان په مرکز واڼه کې يوې قبايلي جرګې ته وينا کوله.

مطبوعات وايي چې ګورنر ( والي ) او نور کسان حمله کې بچ پاتې شو ولې ګورنر د بريد وروسته په فوري توګه پېښور ته واپس ستون شو او بعضې ټاکل شوي پروګرامونو کې يې برخه وانخيسته.

يو حکومتي وياند وايي چې د بريد هدف ګورنر نه و او دا چې د وخت د کموالي له امله ګورنر پېښور ته واپس ستون شو .