حنان حبيبزى

	د بدخشان ولايت د جرم ، ارګو ، كشم ، شهدا او په يو شمير نورو ولسواليو كې تر هر ځاى زيات كوكنار كرل شوي دي

ده له هغو دولتي او نادولتي څانګو څخه چې له افغان دولت سره د نشيي توكو د له منځه وړلو په برخه كې مرسته كوي وغوښتل چې د كوكنارو د كښتونو د له منځه وړلو لپاره دغه ولايت ته ژر تر ژره مرستې ورسوي .

والي د هغو مرستو غوښتنه كوي چې د بديل معيشت په توګه د كوكنارو له كروندګرو سره يې افغان دولت او نړيوالې ټولنې ژمنه كړې ده .

ده بي بي سي ته وويل چې په دغه ولايت كې د نشيي توكو د توليد ، قاچاق او كاروبار د مخنيوي لپاره ژمنه شوې مرستې نه دي ورسيدلي .

ښاغلي مجيد وويل كه د كوكنارو د كښتونو د له منځه وړلو په موخه له زور څخه كار واخلي ، د نشيي توكو قاچاق كونكو ته به پلمه په لاس ورشي او د ده په وينا د كروندګرو او پوليسو ترمنځ به د تاوتريخوالي د رامنځته كېدو لامل ورګرځي .

بدخشان چې په بشپړ ډول يو غرنى ولايت دى ، د دولتي ځواكونو ولكه پر هغو سيمو ډيره كمه ده چې په دغه ولايت كې د كوكنارو د توليد اصلي ځايونه بلل كيږي .

والي منشي عبدالمجيد وويل چې د بدخشان ولايت د جرم ، ارګو ، كشم ، شهدا او په يو شمير نورو ولسواليو كې تر هر ځاى زيات كوكنار كرل شوي دي او په همدې سيمو كې يې توليد د ده په وينا پر هيروينو اړول كيږي .

پوليسو بيا بيا ويلي دي چې په بدخشان كې يې د هيروينو د توليد په لسګونو فابريكې له منځه وړي دي او هغه ځايونه يې په نښه كړي دي چې ترياك پر هيروينو اړوي .

خو والي منشي عبدالمجيد وويل چې لا هم په دغه ولايت كې د نشيي توكو قاچاق كونكي د هيروينو د توليد كارخانې له يو ځاى څخه بل ځاى ته ليږدوي او په ګرځنده ډول فعاليت كوي .

ده وويل له دې سره سره چې د كوكنارو د كښتونو د له منځه وړلو پر وخت د نشيي توكو د قاچاق كونكو له خوا د وسله وال غبرګون اټكل كوي خو چا ته به اجازه ور نه كړي چې د ده په وينا بدخشان د نشيي توكو د توليد د يو لوى مركز په توګه پاتې شي .

دغه ولايت له منځنۍ اسيا سره پوله لري او چارواكي وايي چې د نشيي توكو قاچاق كوونكي په كې ډير فعال دي .