بابرا پليټ له اسلام اباده

	ولسمشر مشرف وايي افغانستان بايد په خپل کور کې نظم سم کړي .

پاکستاني چارواکي وايي په دغۀ بريد کې د دوى په وينا د بهرنيو اورپکو شاوخوا ٣٠ کسان وژل شوي يا ټپيان شوي دي .

دغه بريد د شمالي وزيرستان په قبايلي سيمه کې شوى دى .

پاکستاني توپ لرونکو چورلکو پر اتو کورونو بمبارۍ وکړې او ورپسې پلي سرتيري ورغلل .

پاکستاني مامورين وايي دوى د هغو استخباراتي معلوماتو پر بنسټ عمل کاوۀ چې ويل يې يوه ډله بهرني اورپکې په افغانستان کې له بريده وروسته دغلته پټ شوي دي .

دوى وايي په وژل شويو کسانو کې بهرني اورپکې شته دي خو لا تر اوسه د چا مړى نه دى موندل شوى او دغلته لا هم مقاومت روان دى .

په يوۀ روغتون کې ملکي قربانيانو وويل د دوى گاډى د توپ لرونکو چورلکو په يوۀ توغندي ولگيد . داسې ښکاري چې د سيمې په لوى ښارگوټي ميرانشاه کې مخالفت په زياتيدو دى .

په سيمه کې سرچينې وايي يوۀ ملا پر خلکو غږ کاوۀ چې راووځي او پر امنيتي ځواکونو بريد وکړي ، رپوټونه ښيي چې وسله وال قبايل سره ټوليږي .

دا بريد په داسې وخت کې شوى چې د پولې له پورې غاړې د بريدونو په باب له افغانستان سره د پاکستان لانجه روانه ده .

افغان مامورين پر پاکستان تور لگوي چې لوړ پوړي طالب سټي او نور اورپکې نه نيسي .

دا تورونه په داسې وخت کې ډير شوي دي چې ولسمشر بوش سيمې ته سفر کوي او پاکستاني ولسمشر پرويز مشرف سخت غبرگون ښوولى دى .

دۀ دا ومنل چې د پاکستان له خاورې ځينې اورپکې پورې غاړې اوړي خو دۀ بي بي سي ته وويل پوځ داسې گامونه اخلي چې دا عمل ودروي .

دۀ دا هم وويل چې افغانستان بايد په کور دننه نظم راولي . ښاغلي مشرف زياته کړه تر پاکستان په افغانستان کې ډير اورپکې فعاله دي .

خو ځينې پاکستاني شننونکي د شمالي وزيرستان دغه وروستي عمليات د جنرال مشرف له خوا خپلو نقد کوونکو ته عملي ځواب گڼي .

د پاکستان نور خبرونه د دې ځاى په کېکاږلو ترلاسه کړئ