غزل اکمل له کابله

	ولسمشر کرزى به د پاکستان د سفر په ترڅ کې له ولسمشر مشرف او لومړي وزير شوکت عزيز سره وويني .

د افغانستان ولسمشر به په دغه سفر کې د پاکستان ولسمشر پرويز مشرف او د دغه هيواد لومړي وزير شوکت عزيز سره وگوري .

ښاغلى کرزى به په دغه سفر کې د ترهگرۍ په وړاندۍ د مبارزې د سختوالي او په سيمه کې د زياتو همکاريو د ټينگښت په اړه د هغه ځاى د چارواکو سره وغږيږي .

له ښاغلي کرزي سره په دغه سفر کې د کابينى ځيني غړي ، د مشرانو او ولسي جرگو استازي او د ځينو ولايتونو واليان هم شامل دي .

د افغانستان د بهرنيو چارو وزير ډاکټر عبدالله له بي بي سي سره په خبرو کې وويل چې د دغه سفر نيت لا پخوا شوى وو .

ښاغلي عبدالله وويل چې افغانستان به له پاکستان سره د ترهگرۍ په برخه کې د لا زياتې همکارۍ په باب خبرې وکړي .

د افغانستان د دولت وياند کريم رحيمي نن ( د سلواغې ٢٥ د فبروري ١٤ ) په يوې خبري غونډې کې وويل چې ولسمشر کرزى به پاکستان ته په خپل دغه سفر کې د سيمې په امنيتي او اقتصادي مسايلو د نوموړي هيواد چارواکو سره خبرې اترې وکړي .

همدارنگه ښاغلي رحيمي د افغانستان په بيلا بيلو سيمو کې وروستي بريدونه د افغانستان د خلکو د دښمنانو کمزوري وبلله .
په دى وروسيتو کې ځيني امنيتي چارواکي وايي چې د زابل او کونړ په ولايتونو کې يې د وروستيو تاوتريخوالو په ترڅ کې ځيني پاکستاني وگړي هم نيولي دي .

ولسمشر کرزى به پاکستان ته په خپل سفر کې د هغه هيواد په پوځي اکاډمۍ سرتيرو او افسرانو ته وينا وکړي همدارنگه په پام کې ده چې د پاکستان ځينو سواداگرو او خصوصي متشبيثينو سره هم وگوري .

په پاکستاني رسنيو کې خبر ورکړل شوى چې ولسمشر کرزى به چارسدې ته هم ځي چې د مخکښه پښتون سياستوال خان عبدالولي خان فاتحه وکړي .

ښاغلي کرزى پاکستان ته سفر په داسى حال کې سفر کوي چې په دې وروستيو کې د پاکستان پولو ته نژدې ولايتونو کې نا کرارۍ زياتې شوي او د افغانستان چارواکي وايي چې ترهگر او ورانکاران د پولي له هغې ډډې راځي .

د افغانستان نور خبرونه د دې ځاى په کېکاږلو ترلاسه کولى شئ

د پاکستان نور خبرونه د دې ځاى په کېکاږلو موندلى شئ