کرزى به برخه والو ته وايي چې پانگه وال کولى شي له ننني افغانستان نه ښې گټې تر لاسه کړي

د افغانستان ولسمشر حامد کرزى د فبروري په ١٩ په جده کې په جوړيدونکې نړيواله اقتصادي غونډه کې د گډون لپاره د جمعې په گهيځ سعودي عربستان ته ولاړ. نوموړى د(( جدې )) د فورم په نامه نومول شوې دغې غونډې ته چې د فبروري له ١٩ تر ٢١ نيټې پورې دوام مومى ، په دې نيت ورغلى چې د غونډې برخه والو ته د افغانستان د اقتصادي ضرفيتونو د وړتيا په تړاو ډاډ ورکړي .

په ټوله کى به د دوى هڅه دا وي چې د غونډې برخه وال په افغانستان کې پانگې اچونې او د سوداگريزو فعاليتونو پراختيا ته وهڅوي .

په پام کې ده چې ښاغلى کرزى به دا کار غونډې ته د وينا له لارې وکړي .

د جدې په غونډه کې د نړۍ له بيلابيلو هيوادونو څخه شاوخوا ٢٠٠٠ استازي برخه اخلي

دښاغلي کرزي خبرې به هم تر ډيره د امنيت او د پانگې د خونديتوب له اړخه د ننني او پروني افغانستان تر مينځ په توپيرونو راټولي وي او دا چې پانگه وال کولى شي له ننني افغانستان نه ښې گټې تر لاسه کړي .

د جدې همدغه اقتصادي فورم ته چې له شپږو کالو راهيسې د جدې د سوداگرۍ د ا اطاقونو او د لندن د سوداگرۍ د پوهنتون په نوښت جوړيږي، د نړۍ له بيلابيلو هيوادونو څخه شاوخوا ٢٠٠٠ استازي ورتلونکي دي .
په دې کې د چک جمهوريت ولسمشر واکلاو کلاوس ، د سينگال ولسمشر عبدلاى او د پاکستان لومړى وزير شوکت عزيز هم شامل دى .

د فورم دغه سږنۍ غونډه د ظرفيت جوړونې تر سرليک لاندې جوړيږي او د بحث مرکزي موضوع به يې د وگړو لپاره د تلپاتې پرمختيا د رامينځ ته کولو پر لارو چارو خبرې اترې وي . .