ولسمشر کرزي په افغانستان کې د فساد خبره ومنله خو ويې ويل چې د وخت په تيريدا او له پرله پسې هلو ځلو وروسته به دغه ستونزه حل شي .

ولسمشر کرزي په کوپنهاگن کې د ډنمارک له لومړي وزير اندرېس فوگ راسموسين سره تر ليدو وروسته له خبريالانو سره په خبرو کې وويل په هيله يوو چې په افغانستان کې د ديموکراسۍ د غوړيدا ، د بشري حقونو او د قانون د برلاسۍ لپاره نړيوال مرستې وکړي .

ولسمشر کرزي په افغانستان کې د فساد خبره ومنله خو ويې ويل چې د وخت په تيريدا او له پرله پسې هلو ځلو وروسته به دغه ستونزه حل شي .

حامد کرزي خبريالانو ته زياته کړه چې افغانستان په تيرو څو کلونو کې خورا ډير پرمخنگ کړى دى خو لاهم تر پنځو يا ١٠ کلونو پورې د نړيوالو مرستو ته اړتيا لري .

ولسمشر کرزى په لومړي ځل نن ډنمارک ته په رسمي سفر تللى و.

دۀ د ډنمارک له ملکې مارگريت او د هغې له خاوند شهزاده هينريک سره په شاهۍ ماڼۍ کې وليدل او وروسته يې له لومړي وزير او نورو لوړ پوړو جارواکو سره غرمنۍ وخوړه .

ډنمارک تيرکال له افغانستان سره د ١١٠ ميليونه ډالرو په انډول مرسته کړې وه .

د ناټو په مشرۍ کې د ايساف د ځواکونو لپاره ډنمارک ١٦٠ سرتيري ورکړي دي . ١٠ ورځې وړاندې په کوپنهاگن کې پارلمان ومنله چې د ناټو لپاره ٢٠٠ نور سرتيري هم لاړ شي .

د افغانستان نور خبرونه د دې ځاى په کېکاږلو ترلاسه کولى شئ