ولسمشر کرزى د اسلامي هيوادونو په يوې ځانگړې سرمشريزې کې برخه اخلي .

د غونډې د بحث موضوع د اسلامي هيوادونو په وړاندې د پرتو ننگونو ارزول دي .

غونډه په پلازمينه رياض کې د چهارشنبې په ورځې پيليږي او د پنجشنبې د ورځې تر پايه به دوام مومي .

په کابل کې د ولسمشر مطبوعاتي دفتر ويلي چې ښاغلى کرزى به غونډې ته مفصله وينا وکړي .

دغه سرمشريزه د پادشاه عبدالله په بلنه ترسره کيږي چې په سعودي عربستان کې به پر کورنيو اصلاحاتو او اسلامي نړۍ پر مسايلو غور کوي .

د عراق او فلسطين پر چارو به هم خبرې کيږي . افغان چارواکي وايي ولسمشر کرزى به په خپله وينا کې پر هغو ستونزو رڼا اچوي چې اوس اسلامي نړۍ ورسره مخامخه ده . ښاغلى کرزى به د اسلامي هيوادونو ترمنځ پر لا ډيرې همکارۍ هم ټينگار کوي .

ولسمشر کرزى به د سعودي عربستان او يو شمير نورو اسلامي هيوادونو له مشرتابۀ سره جلا ليدنې کتنې هم کوي .

د افغانستان د بهرنيو چارو وزير او د ملي امنيت مشر به هم په دغۀ سفر کې له ولسمشر کرزي سره ملۀ وي .