محمد قاضي زاده له هراته

	د سويل لويديځو ولايتونو په پرتله په هرات کې امنيت ښه بلل کيږي .

د پوليسو په وينا په دغو چاودنو کې هيڅ ډول مرگ ژوبله يا مالي تاوان نه دى اوښتى .

د هرات پوليسو نن ( د مرغومي ٢١ د جنوري ١١ ) وويل چې دا چاودنې د طالبانو يا د القاعدې له خوا نه دي شوي .

د هرات پوليسو ادعا وکړه دغه ډول چاودنې چې په تيرو پنځو مياشتو کې څو ځلي تکرار شوي د سيمه ييزو ناخوښو کسانو له خوا کيږي .

پوليس د دغو (( ناخوښو )) کسانو نوم نه اخلي او له نورو جزيياتو هم ډډه کوي .

دا چاودنې عمومآ د شپې له خوا په داسې ځاى کې کيږي چې ځاني او مالي زيان نه لري خو غږ يې خورا لوړ وي .

څو مياشتې وړاندې د هرات والي سيد حسين انوري له دې ته ورته چاودنو وروسته ويلي وو چې دا کار د دۀ په وينا د افغانستان د اصلي دښمنانو کار نه دى بلکه د هغو سيمه ييزو ناراضيانو عمل دى چې د هرات په ولايت کې له اداري جوړښته ناخوښه دي .

ښاغلي انوري هم له نورو جزيياتو ډډه کړې وه .

د طالبانو له نسکوريدو راهيسته ښاغلى انوري په هرات کې دريم کس دى چې د والي په توگه دنده ترسره کوي .

لومړى قومندان اسماعيل خان و چې ملاتړو يې د طالبانو له وتلو وروسته د هرات ښار ونيوۀ . ښاغلى اسماعيل خان د ولسمشر حامد کرزي له خوا کابل ته وبلل شو او پر ځاى يې سيد محمد خيرخواه د والي په توگه وټاکل شو .

د ښاغلي خيرخواه له ټاکلو سره په هرات ولايت کې اداري جوړښت تر ډيره بدل شو . د دغه ولايت ډير لوړ پوړي چارواکي نوي شول .

تير کال د اوسني والي سيد حسين انوري له راتگ سره هم ځينې بدلونونه وليدل شول .

د هرات په ښار کې ځينې کسان په ځايي اداره کې پر بدلونونو ناخوښه دي خو عام وگړي بيا تر ډيره د دې عمل هرکلى کوي .

د افغانستان نور خبرونه د دې ځاى په کېکاږلو ترلاسه کړئ