د کندهار والي اسد الله خالد وايي دا يوه تيروتنه وه .

د افغانستان د کندهار ولايت والي اسد الله خالد وايي چې د ميوند په ولسوالۍ کې نړيوالو ځواکونو څلور افغان پوليس وژلي دي .

ښاغلي خالد وويل ايتلافي ځواکونو پر دغو پوليسو د طالبانو گومان کړى وو .

دغه پېښه د دوشنبه په شپه ( د تلې ٢٥ اکتوبر ١٧ ) د ميوند په ولسوالۍ کې چې د کندهار ښار په لويديځ کې پرته ده ، وشوه .

د کندهار والي وويل امريکايي ځواکونه د اورپکو په لټه کې وو چې افغان پوليسو هوايي ډزې وکړې او ورپسې د نړيوالو ځواکونو له خوا بريد وشو .

په کابل کې د امريکايي ځواکونو يوۀ وياند وويل د دغې پېښې په اړه اوس پلټنې پيل شوي دي .

دا په تيرو څو وختونو کې دوهمه دغه ډول پېښه ده چې نړيوال ځواکونه پکې په تېروتنه افغان پوليس وژني .

څه موده وړاندې په گاونډي هلمند ولايت کې هم امريکايي ځواکونو پر افغان پوليسو ډزې کړې وې او څلور تنه يې پکې وژلي وو .