د کندهار په ښار کې امريکايي سرتيري د امنيت ساتنې په چارو کې له افغان پوځ او پوليسو سره مرسته کوي .

د افغانستان په جنوب کې د امريکا ترمشرۍ لاندې ځواکونو يوې اډې ته نژدې چاودنه شوې ده.

دوه کسان په دغه چاودنه کې ژوبل شوي او اته ټانکرونه چې د کندهار هوايي اډې ته يې تيل لېږدول له منځه تللي دي.

دا خبره افغان پوځي چارواکو کړې ده .

د چاودنې د لامل په اړه متضادې خبرې شوي، ځېنې چارواکي وايي چې يوۀ ټانکر کې بم ايښودل شوى وۀ، نور وايي چې چاودنه د هغه اور له امله پېښه شوه چې موټر چلونکو د خوړو د پخولو لپاره لگولى وۀ.

له بلې خوا د کندهار په ميوند ولسوالۍ کې د پوليسو دوه افسران تېره شپه ( د تلې ٢١ د اکتوبر ١٣ ) د شکمنو طالبانو په يوۀ بريد کې وژل شوي دي.

په روان ميلادي کال کې تر اوسه پورې د تاوتريخواليو له امله په افغانستان کې تر ١٢٠٠ ډير کسان وژل شوي دي .