تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
غلا شوی لرغونی تابوت بېرته مصر ته وسپارل شو
امریکايي چارواکو هغه لرغونی تابوت بېرته مصر ته سپارلی، چې دوه کاله مخکې د نیویارک ښاروالۍ موزیم تر لاسه کړی و. د نیدجیمانخ نومي مذهبي راهب دغه تابوت ۲۱۰۰ کاله پخوانی دی، چې د هنري اثارو لېږد رالېږد یوې نړیوالې شبکې له لوري پر نیویارک موزیم پلورل شوی و.
چارواکي وايي، د تابوت پلورونکو جعلي اسناد چمتو کړي وو. په سرو زرو کې نغښتی دغه تابوت په ۲۰۱۱ کال کې مصر کې غلا شوی او بهر ته قاچاق شوی و.
د رویټرز خبري اژانس په رپوټ کې د منهټن سیمې مختار وکیل یا اټارني سایرس ونس له قوله ویل شوي:
"زموږ معلومات ښيي چې دا تابوت له هغو سلګونو نایابو اثارو یوازې یو دی چې دغې نړیوالې شبکې غلا کړي دي."
نوموړي په نیویارک کې د دغه تابوت بېرته سپارلو په مراسمو کې زیاته کړه، داسې نور اثار هم ښايي ترلاسه شي.
ویل کېږي موزیم دغه څه باندې ۲۱ پېړۍ پخوانی تابوت د هنري اثارو له یوه پارسي سوداګره د څلورو میلیونو ډالرو بدل کې اخیستی و.
چارواکو ځايي رسنیو ته ویلي، لومړی دغه تابوت جرمني ته لېږدول شوی و او وروسته فرانسې ته وړل شوی، چې بیا یې د پلور پر مهال د وارداتو او صادراتو یو مصری جواز چې د ۱۹۷۱ کال نېټه پرې لیکلې وه، له نورو جعلي اسنادو سره وړاندې شوی و.
چارواکي وايي،۲۰۱۱ کال له غلا کېدو مخکې دغه تابوت د مصر په مینا سیمه کې څه باندې دوه زره کاله تر خاورو لاندې خښ و. د رویټرز رپوټ وايي، د مصر بهرنیو چارو وزیر سامح حسن شکري په دې اړه وویل:
''دا یوازې د مصر نه دی، بلکې زموږ ټولو انسانانو شریک میراث دی. ''
ویل کېږي، ۲۰۲۰ کال کې به دغه تابوت مصر کې نندارې ته وړاندې شي.
