تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
آریانا: منفي خبرې پر ما اغېز کوي، خو پر کار مې نه
پر خواله رسنيو ګڼو افغان هنرمندانو او پېژندل شويو څېرو ته منفي خبرې کېږي او ځینې ښکنځل کېږي هم، په تېره بیا ښځې.
د افغانستان وتلې سندرغاړې اريانا سعيد په دې باور ده، چې دغه حالت يو څه بدل شوى خو لا هم ځينې خلک شته چې له بدو خبرو لاس نه اخلي.
آغلې سعید د بي بي سي د "سل ښځې " لړۍ په مناسبت مرکه کې وویل چې خواله رسنیو کې د دې په اړه منفي خبرې، د یوه انسان په توګه هرو مرو پر دې اغېز کوي خو هڅه کوي پر کار یې اغېز ونه کړي.
د آریانا سعید په آند ښځې د خپل ښځیتوب لپاره د نرانو پر تله، تر ډېرو بریدونو راځي.
آریانا سعید چې بریتانیا کې ژوند کوي، له نژدې یوې لسیزې راپدېخوا سندرې بولي. سعید وروسته له دې چې طالبان له واکه ګوښه شول یوه له لومړنیو سندرغاړو وه چې کابل کې د زرګونو مینه وال پر وړاندې د ستېج پر سر څرګنده شوه.
آریاناسعید چې پخپله هم د پېژندل شوو پخوانیو سندرغاړو سندرې وايي، په دې آند ده چې د ټولنې مطرح کسان چې په الګو بدلېږي باید د خلکو له غوښتنو سره ځان عیار کړي، خو له خلکو غواړي چې د هنرمندانو شخصي چارو کې ځان ته حق ورنکړي.
آریانا سعید د ښځو د حقونو په برخه کې هم فعالیت کوي.
مېرمن سعید هغه مهال ډېر شهرت ته ورسېده چې د افغانستان د یوه شخصي تلویزیون افغان ستوري په نوم د سندرو د سیالۍ خپرونه کې د غوراوي د میز ترشا کښېناسته.
