تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ټویټر: اېلون مسک پر ډونلډ ټرمپ بندیز لیرې کړ
د ټویټر نوي څښتن اېلون مسک ویلي، د امریکا د مخکني ولسمشر ډونلډ ټرمپ ټویټر اکونټ بېرته فعال شوی. د نوموړي اکونټ وروسته تر هغه بېرته فعال شو چې د ټویټر کارنو یوه نظرپوښتنه کې د مخالفانو پر وړاندې دوه سلنه لوړه رایه وګټله.
مسک پر ټویټر لیکلي: "خلک وغږېدل" چې په وینا یې پر ټویټر د ټرمپ د اکونټ د بندیز لیرې کېدو نظرپوښتنه کې له څه باندې ۱۵ میلیون کارنو ۵۱.۸ سلنه کسانو د بندیز لیرې کېدو په پلوۍ رایه ورکړه.
خو د امریکا پخوانی ولسمشر ښايي بیا خپل اکونټ ته راستون نه شي. هغه مخکې ویلي وو "ددې لپاره هېڅ لامل نه وینم".
د ټرمپ ټویټر اکونټ په ۲۰۱۵ کال تاوتریخوالي ته د لمسوونکو ټویټونو له کبله بند شو.
د ټویټر مخکنۍ ادارې دا پرېکړه واشنګټن کې پر کانګرس ودانۍ (کپیټول) د ټرمپ د پلویانو تر برید څو ورځې وروسته کړې وه.
سلګونه اړ و دوړ جوړوونکو پر داسې مهال پر ودانۍ برید وکړ چې کانګرس په ولسمشریزو ټاکنو کې د جو بایډن د بریا تاییدولو لپاره تابیا نیوله.
دې تاوتریخوالي کې لږ تر لږه څلور ولسي وګړي او یو پولیس ووژل شول.
د اړ و دوړ له دې پېښې لږ موده ووسته پر فیسبوک، انسټاګرام او یوټیوب هم د ټرمپ حسابونه بند شول. پر خواله رسنیو ټرمپ لسګونه میلیونه کتونکي او تعقیبوونکي لرل.
څو میاشتې وروسته، ټرمپ د (ټروت سوشل Truth Social) په نامه خواله رسنۍ خپل پیغامونه خپرول.
د روانې اونۍ لومړیو کې، دغه مخکني جمهوریپال ولسمشر وویل چې د امریکا ۲۰۲۴ کال ولسمشریزو ټاکنو ته بیا ځان نوماندوي.
د نړۍ تر ټولو شتمن اېلون مسک په تېره اکتوبر میاشت کې ټویټر د ۴۴ میلیارد ډالرو بدل کې واخیست.
دغه ددغې لویې خواله رسنۍ مدیریت کې بنسټیز بدلونونه راوستل.
د روانې اونۍ پیل کې مسک د ټویټر کارنو ته وویل چې دفترونه به یې د لنډ وخت لپاره تړلي وي.
دا اعلان د مسک له یوه بل هغه اعلان تر خپرېدا وروسته وشو چې له کارمنو یې د اوږد مهال لپاره د کار کولو غوښتنه کړې وه که نه دندې درې پرېږدي، همدا وو چې ډېری کارمنان له دندو لاس په سر شول.
