تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
تونس کې له زندان پنځه "خطرناک" بندیان تښتېدلي
تونس کې له یوه زندانه پنځه بندیان چې د دغه هېواد حکومت 'خطرناک توندلاري اسلامپال' بللي تښتېدلي دي.
د تونس کورنیو چارو وزارت د دغو کسانو عکسونه خپاره کړي او له خلکو یې غوښتي چې که د دوی په اړه څه مالومات لري نو د 'ترهګریزو کړنو' مخنیوي لپاره دې یې ورسره شریک کړي.
دغه وزارت پر خپله فېسبوک پاڼه لیکلي چې دا سړي د سېشنبې سهار وختي له مارنوګویا زندانه تښتېدلي دي.
په تښتېدلو بندیانو کې احمد مالکي هم دی، چې رویټرز خبري اژانس وايي په ۲۰۱۳ کال کې د دوو سیاسونو د وژلو له کبله زنداني وو.
هغه د "سومالي" په نوم هم پېژندل کېده او د سیکولار سیاستوال 'شکري بلعید' او 'محمد براهمي' د وژلو قضیو کې پر ۲۴ کاله بند محکوم شوی و.
دا وژنې د دې لامل شوې چې په ۲۰۱۳ کال تونس کې سیاسي کړکېچ رامنځته او په پایله کې یې بالاخره حکومت ګوښه کېدو ته اړ شي.
رویټرز زیاتوي چې په تښتېدلو بندیانو کې همدا راز 'راید التواتي' هم دی، چې امنیتي سرچینې وايي د تېرې لسیزې په اوږدو کې د تونس لروبر په ګڼو خونړیو بریدونو کې ښکېل و.
د عربو پسرلي په نوم پاڅونونه په ۲۰۱۱ کال کې له تونس پیل شول او دغلته احتجاجونو د 'زین العابدین بن علي' اوږده واکمني پای ته ورسوله.
خو دغه هېواد اوس هم له دې کبله له زیاتېدونکي سیاسي اړو دوړ سره مخامخ دی چې ولسمشر 'قیس سعید' پکې د بشپړ واک لاسته راوړلو هڅه کوي.
تونس په ۲۰۱۵ کال کې هم د یوه خونړي ترهګریز برید شاهد و.
په دغه کال یوه وسله وال سړي د دغه هېواد شمال کې د سیلانیانو په یوه ډېر مشهور ځای سوسې کې ډزې وکړې او ۳۸ کسان یې ووژل.
