د هنګري مشر وايي امریکا او اروپا کې به ښي اړخي ګوندونه راپورته شي

د هنګري لومړي وزیر ویکتور اوربان د خپلو پلویانو یوې ډلې ته وینا کې ویلي دده د حکومت ملتپاله محافظه کاره تګلارې به سږکال په اروپا او بهر کې ګټونکې وي.

بوداپېست کې هغه وویل "موږ دا کال یواځې پېل کړ، د کال ترپایه به موږ په نړۍ کې اکثریت یو‍‍‍‍."

هغه ډاډه دی چې ډونالډ ټرمپ به په نومبرکې د امریکا د ولسمشرۍ ټاکنې وګټي او ښی اړخي ګوندونه به په جون کې د اروپايي پارلمان ټاکنو کې هم برلاسي وي.

د هنګری د ملي ورځې په مناسبت وینا کې هغه وویل "که موږ غواړو چې د هنګري ازادي او حاکمیت وساتو، بله لاره نه لرو، باید برسلز اشغال کړو."

ښاغلی اوربان له پخوا اروپايي ټولنې سره اختلافونه لري، خو خپلو پلویانو ته یې وویل د امریکا په متحدو ایالتونوکې هم دوی (د حاکمیت بدلون) کې مخکې دي.

دده دا تبصرې، د اوکرایین جګړې په اړه د هنګري دریځ، اود کور دننه دده لخوا د واک تمرکزپه اړه نړیوالو نیوکو پرسر او واشنګټن کې د بایډن ادارې سره د لفظي شخړې یوه و روستۍ برخه ده.

تېره اونۍ فلوریډا کې، له ټرمپ سره له کتنې وروسته، د هنګري مشر وړاندوینه وکړه چې اوکرایین کې به د روسیې جګړه ختمه شي ځکه چې د امریکا راتلونکی ولسمشر به "یوه پېسه هم کییف" ته ورنه کړي.

ولسمشربایډن ژر په غبرګون کې وویل ښاغلی اوربان " فکر نه کوي چې ډیموکراسي کار کوي او دی د دیکتاتورۍ په لټه کې دی."

بوداپېست کې د امریکا سفیر ډېوېډ پرېسمن هم دا اونۍ د هنګري پرلومړي وزیر نیوکه وکړه او وې ویل "لومړی وزیر اوربان، چې له یوې خوا بې بنسټه ادعا کوي چې د امریکا د متحدو ایالتونو حکومت غواړي دده حکومت نسکوره کړي، له بلې خوا په ښکاره د امریکا د متحدو ایالتونو د ولسمشر سیاسي ماتې غوښتنه کوي او په فعاله توګه د امریکا د متحدو ایالتونو د ګوندونو په سیاسي مسلو کې برخه اخلي."

د جمعې پر ورځ وینا کې، ښاغلي اوربان د اروپايي ټولنې په اړه توندې خبرې وکړې او وروسته چې کله یې پلویان خپلو کورونو ته تلل، ځینویې یو تنها ځوان اعتراض کوونکي ته- چې د اروپايي ټولنې ابي بېرغ ورسره و- توندې اوږدې خبرې وکړې.

د پیټرسورګو په نوم یو تن بي بي سي ته وویل " موږ باید له ډونالډ ټرمپ او روسانو څخه هنګري وساتو، نه له اروپايي ټولنې څخه."

د امریکا او هنګري ترمنځ شخړې په مرکز کې د هنګري د حکومت دا غوښتنه ده چې وايي اوکرایین کې دې سملاسي اوربند وشي. هنګري کییف ته د پوځې مرستو ورکولو مخالفه ده، او لوړو روسي مامورینوسره پرلپسې غونډې کوي، لکه تېر اکتوبرکې په بېجینګ کې ولادیمیرپوتین سره د ویکتور اوربان کتنه.

د امریکا سفیرد مارچ پر ۱۴مه بوداپېست کې وویل د اوکرایین جګړې په اړه د هنګري دریځ "له واقعیته لیرې دی، د هنګري تګلاره د دې خیال پربنسټ ولاړه ده چې د اوکرایین بې وسلې کول به پوتین ودروي. تاریخ ښيي چې دا به برعکس نتیجه ولري. دا د سولې یو وړاندیز نه دی، بلکې بشپړ تسلیمېدل دي."

د ښاغلي اوربان محافظه کاره ملتپال فیدېز ګوند له ۲۰۱۰کال راهیسې واکمن دی او د بایډن اداره هم د دموکراسي تعریف په اړه د هنګري د دریځ پرسر ورسره اختلافونه لري.

د امریکا سفیرهنګري کې د ولسواکۍ په اړه وویل هلته " په سیستماتیک ډول خپواکه رسنې ترکنټرول لاندې راوستل کېږي، شتمن کسان رسنۍ رانیسي او بیا یې هغوبنسټونو ته سپاري چې د حکومت ترکنټرول لاندې دي، او یوڅو رسنۍ چې خپلواکه پاتې دي تحقیقاتو، د مالیې په اړه پلټنو سره مخ کيږي، اود اعلانونو عواید له لاسه ورکوي."

ښاغلی اوربان او حکومت یې اوس له داسې یوه اړخه چې تمه یې نه کېده له ننګونې سره مخ دي.

۴۳ کلن پیټرمګیار چې پخوا د حاکم ګوند (فیدېز) پلوي و او یو سوداګر دی، یو نوی سیاسي ګوند جوړکړی چې د جمعې پرورځ یې د یوې غونډې په ترڅ کې اعلان کړ او په بوداپېست کې یې په لسګونو زره خلک راجلب کړي وو.

ښاغلي مګیار له اروپايي ټولنې سره د رغونکو خبرو اترو غوښتنه وکړه اوخپلو پلویانو ته یې وویل د ټولو هغوکسانو لپاره چې د کمونیزم له ړنګېدو راهیسې تېرو درې لسیزو کې د شویو تېروتنو څخه ناراضي دي "د هنګریانو، ودرېږئ" په نامه یوِغورځنګ جوړوي.

ښاغلي مګیار پرفېسبوک لیکلي " د واورو هرتوپان د واورو له وړو ټوټو یا بڅرکو څخه پېل کېږي"، او ژمنه یې وکړه چې’’ فساد او خپلوي پالنې’’ پرضد به مبارزه وکړي چې دده په خبره د ویکتور اوربان حکومت ورباندې ککړدی.

دا نوی ګوند به هڅه وکړي چې د هنګري په سیاسي مرکز کې هغه تشه ډکه کړي چې ښی خوا ته د فیدېز حاکم ګوند د تلو اود موجود اپوزیسیون د ناکامي له امله رامنځته شوې.

د پیټرمګیارغورځنګ غواړي د یو جدي ځواک په توګه رامنځته شي اوپه ۲۰۲۶کال کې راتلونکو پارلماني ټاکنوکې د فیدېز حاکم ګوند پر وړاندې ودرېږي.