تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کرېکټ؛ د پاکستان سوپر لیګ نهم پړاو له افغان ملي لوبغاړو پرته پيل شو
- Author, یوسف خان ځدراڼ
- دنده, بي بي سي،لندن
د پاکستان سوداګریز کرېکټ غوره لیګ نهم پړاو پرون (شنبه د فبرورۍ ۱۷مه) لاهور کې پیل شو.
د دې لیګ لومړۍ لوبه د تېر کال اتلې لوبډلې لاهور قلندرز او اسلام اباد یونایټېډ تر منځ وه چې اسلام اباد لوبډلې په اتو وېکټو وګټله.
دغې لوبډلې د لاهور قلندرز د ۱۹۵ منډو هدف یوازې د دوه لوبغاړو له اوټېدو وروسته داسې مهال پوره کړ چې لا د لوبې نږدې دوه اورونه پاتې وو.
نن دویمه ورځ پېښور زلمي د کوټې پر وړاندې لوبېږي.
په دې لیګ کې د لاهور قلندرز، اسلام اباد یونائیټېډ، کراچي کېنګز، پېښور زلمي، کوټه ګلېډیټرز او ملتان سلطان شپږ لوبډلې ګډون کوي، چې په ترکیب کې یې یو شمېر بهرني لوبغاړي هم دي.
د سوداګریزو لوبو پرانېستو ته پرون لاهور کې د امنیتي تدابیرو تر څنګ د ساز، ګډا او اورلوبو مراسم هم ترتیب شوي وو.
دا لوبې پاکستان کې له ټاکنو وروسته چې ښکاره د بې ثباتۍ لا امل شوې تر سره کېږي، ځکه خو یې د امنیت لپاره هم ځانګړي تدابیر نیول شوي او ان له پوځي کنډکونو د امنیت لپاره مرسته غوښتل شوې.
د پاکستان سوپر لیګ نهم پړاو رسمي لوبې د لاهور په قذافي لوبغالي کې پیل شوې خو د ملتان، راولپنډۍ او کراچۍ ښارونو کې هم لوبې پلان دي او د پېښور لوبغالی یو ځل بیا له پامه غورځول شوی.
دا لوبې یوه میاشت دوام کوي او ټاکل شوې چې پایلوبه یې د مارچ میاشتې په ۱۸مه کراچۍ کې وشي.
د افغانستان د ملي لوبډلې لوبغاړي ولې نه دي ورغلي؟
د پاکستان سوپر لیګ په سږني پړاو کې له بل هر کاله د افغان لوبغاړو شمېر کم رنګه دی او ځینې هغه چې غوره شوې هم لا له خپلې لوبډلې سره نه دي یو ځای شوي.
یو شمېر افغان لوبغاړو وار له مخه د خپلو بوختیاوو او ملي دندو له کبله له دې لیګه ځانونه باسلي دي.
راشد خان چې د لاهور قلندرز لوبډلې یو مهم لوبغاړی بلل کېږي د یوې ویډیو له لارې چې دغې لوبډلې په خپلو رسمي چاینلونو خپره کړې په سږني لیګ کې د نه لوبېدو ویلي دي.
هغه ویلي "د ملا عملیاتو له کبله به د لاهور قلندرز لوبډلې سره نه وي خو لوبډلې ته ډېرې نېکې هیلې وړاندې کوي."
په تېرو پړاونو کې ګڼو نورو لوبډلو هم افغان لوبغاړي لرل او دغې لیګ ته یې ځانګړي ښکلا وربخښلي وه چې د کرېکټ ګڼ افغان مینه والو یې هم لوبې کتلې، سږ کال بیا د پېښور زلمو درې افغان لوبغاړي غوره کړي و خو د لوبې تر پیلېدو هیڅ افغان لوبغاړی نه و ورغلی.
د پېښور زلمو لخوا غوره شوي دوه لوبغاړي (نوین الحق او نور احمد لکڼوال) دا مهال په شري لنکا کې دي او د افغان لوبډلې لخوا لوبېږي.
له لومړي سره د پاکستان سوپر لیګ کې د ځينو افغان لوبغاړو نه لېوالتیا هم د ملي لوبډلې بوخت مهالوېش و.
د افغانستان ملي لوبډله له شري لنکا سره له لوبو وروسته په همدې میاشت کې له ایرلېنډ سره هم ټسټ، یو ورځنۍ او شل اوریزې سیالۍ لري.
د دغې لوبډلې لخوا بل غوره شوی افغان لوبغاړی وقار سلیمانخېل پرون (شنبه) په متحده عربي اماراتو کې و او نړیوال شل اوریز سوداګریز لیګ پای لوبه کې ولوبېده.
هغه سږ کال د دغه لیګ تر ټولو ډېرو وېکټو اخیستونکی بالر شو.
له دې لوبې یوه ورځ وروسته دی نن (یکشنبه) پاکستان ته رسیدلی، او پېښور زلمي لوبډلې یې هر کلی کړی.
وقار سلیمانخېل د افغانستان له کرېکټ بورډ سره رسمي قرارداد نه لري خو دې وروستیو کې یې په سوداګریزو لیګونو کې ښه پام ځانته اړولی.
وقار سلیمانخېل په نړیوال شل اوریز لیګILT20 کې د اوولسو ویکټو په اخیستو سره د لیګ غوره وېکټ اخسیتونکي جایزه واخېسته او لوبډلې یې اتلولي هم خپله کړه.
د افغانستان فضل حق فاروقي هم دغې لوبډله کې و، او ښې لوبې یې کړې وې.
