قاهره کې د اوربند خبرې؛ لسګونه زره اسرائیلیانو تل ابیب کې مظاهرې وکړې

غزه کې د یوه شوني اوربند او د یرغملو د پرېښودو په تړاو خبرې نن (يکشنبې) هم د مصر په پلازمېنه قاهره کې دوام مومي. د حماس چارواکي وايي پرونیو خبرو کې کوم پرمختګ نه و، خو نن د خبرو اترو یو نوی پړاو پیلېږي.

په لسګونو زره اسرائیلیان د شنبې په ماښام راټول شوي او د اوربند د خبرو اترو له بشپړېدو دمخه د یرغمل شویو کسانو د بېرته ستنېدو لپاره د یوې موافقې غوښتنه کوي.

په تل ابیب کې لاریون کوونکو شعارونه ورکول چې "جګړه سپېڅلې نه ده، ژوند سپېڅلی دی" او ځینو د اسرائیلو لومړی وزیر بنیامین نتنیاهو تورن کړ چې په غزه کې د جګړې د اوږدولو په هڅه کې دی.

دا په داسې حال کې ده چې د شنبې په ورځ د حماس یوه پلاوي په مصر کې له منځګړو سره وکتل.

غورځنګ راپور ورکړ چې کوم نوي پرمختګونه نه دي شوي، مګر زیاته یې کړه چې د یکشنبې په ورځ به د خبرو "یو نوی پړاو پیل شي".

د چارو څارونکي وايي د پرمختګ یو لړ نښې نښانې تر سترګو شوې. قطري، امریکايي او مصر ي چارواکي د شخړې د دواړو غاړو ترمنځ منځګړیتوب کوي.

خبرې په مثبته فضا کې روانې دي. له دغو خوشبینیو سره سره پرون د خبرو په بهیر کې نوې پرمختیا نه وه خو هیله بښونکې بیا دا وه چې د خبرو د یو بل پړاو په پیلولو سلا وشوه او ټاکل شوې نن پیل شي.

حماس وايي مرکچي پلاوی یې له مصري او قطري منځګړو سره ګوري او د هغوی وړاندیز به په بشپړ جدیت واوري.

پخوانی اسرائیلی مرکچي ګېرشان بسکین چې وړاندې یې د اسرائیلو په استازیتوب له حماس سره خبرې کړې وايي، خبرو اترو کې د سي ای اې د مشر وېلیم برنز حضور په دې مانا کېدای شي چې د یوې معاملې تمه کېږي، خو د معاملې پر جزییاتو لا هم کار روان دی.

دی وايي "د هغه (وېلیم برنز) حضور یقینا دې له پاره دی چې د وړاندیز د منلو له پاره پر حماس د لا نور فشار راوستو لپاره له مصریانو سره کار وکړي. خو جزییات لا پاتې او ستونزه هم په همدغو جزییاتو کې ده. یانې همدا جزییات ستونزمنې موضوعګانې دي."

ښاغلی بسکین ټینګار کوي چې د خبرو اترو بریالیتوب د ځینو کلیدي موضوعګانو پر هوارېدو پورې تړلی دی.

په وینایې "یو څه چې حماس له پاره سره کرښه او بیا اسرائیلو له پاره د نه منلو وه، هغه د جګړې د ختمولو ژمنتیا ده. دویم د غزې د شمال او سوېل ترمنځ د بې ځایه شویو فلسطنیانو ازاد تګ راتګ دی، چې اسراییلو تر اوسه نه ده منلې. درېیمه ستونزمنه موضوع به فلسطیني بندیانو پرېښودل وي."

خو حماس دا هم ویلی چې د اسرائیلي حکومت له لوري رفح کې پر پوځي عملیاتو ټینګار د اوربند د هوکړې پر مخ پروت یو خنډ دی.

د اسرائیلو لومړي وزیر بنیامین نتنیاهو وړاندې ویلي وو ان که پر اوربند هوکړه وشي بیا هم اسرائیل به رفح کې د پوځی عملیاتو خپل پلان پر مخ بیايي.

امریکایي چارواکو رفح کې د اسرائیلو د پوځي عملباتو د پلان ملاتړ نه دی کړی، خو سره له دې، په داسې حال کې چې په غزه کې د یوه شوني اوربند په تړاو، په مصر کې خبرې روانې دي اسرائیلو پر رفحې نوي بریدونه کړي.