تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د هرات زلزله؛ تر کنډوالو لاندې "ټول مړي را ایستل شوي"
په هرات کې د طالبانو ځايي چارواکي وايي، د تېرې اوونۍ په زلزله کې د وژل شویو کسانو ټول مړي له کنډوالو را ایستل شوي او د مړو د پلټنې بهیر پای ته رسېدلی دی.
په دغه زلزله کې د وژل شویو کسانو کره شمېر لا هم مالوم نه دی، خو په افغانستان کې د مرستو د همغږۍ ادارې اوچا په یوه رپوټ کې ویلي و، چې په دغه زلزله کې ۱۲۹۴ کسان وژل شوي او ۱۶۸۸ کسان ژوبل دي.
په هرات کې د طالبانو حکومت والي ویاند نثار احمد الیاس بيبي سي پښتو پاڼې ته وویل، چې "تر خاورو لاندې ټول شهیدان را وباسل شول، او په منظم ډول خاورو ته وسپارل شول."
د دغې زلزلې د ګڼو قربانیانو مړي په ډله ییز ډول خاورو ته سپارل شوي دي.
ښاغلي الیاس و نه ویل چې د وژل شویو کره شمېر څومره دی خو وايي له ۱۰۰۰ پورته کسان وژل شوي دي. د هرات زلزلې کې د مرګژوبلې په اړه بېلا بېلې شمېرې ورکړل شوې دي.
د هرات له لومړۍ زلزلې وروسته، د افغانستان په لوېدیځ کې څو ځلې د زلزلې ټکانونه حس شوي چې د رپوټونو له مخې څه باندې ۱۵۰ کسان په کې ټپیان شوي دي.
په افغانستان کې د مرستو د همغږۍ اداره اوچا ویلي وو، چې د افغانستان په لوېدیځ کې له زلزلې وروسته ۴۸۵ کسان ورک دي. خو د دغو ورکو کسان د برخلیک په اړه ډېر مالومات نه ورکول کېږي.
د اوچا د مالوماتو له مخې، په ټوله کې د تېر شنبې زلزلې ۱۲۱۱۰ کسان اغېزمن کړي چې ۱۷۳۰ کورنۍ کېږي.
ځپل شوې کورنۍ د هرات په ګلران، انجیل، خوسان، کشک او زنده جان ولسوالیو کې دي.
په افغانستان کې د ملګرو ملتونو ځانګړې استازې اوتونبایوا هرات ته په سفر کې ویلي و، "دا یوه لویه غمیزه ده، نه یې د زرګونو خلکو پر ژوند سرپه کړې او نه یې کورونه او مالونه روغ پریښي."
هرات کې د طالبانو د ځايي چارواکو په وینا، هغو کورنیو ته خېمې درول شوې چې په زلزله کې یې کورونه وېجاړ شوي دي. خو دوی له مرسته کوونکو غواړي چې د زلزله ځپلو د کورونو جوړولو لپاره نوره مرسته وکړي.
امریکا د افغانستان په لوېدیځ کې له زلزله ځپلو سره د ۱۲ میلیونو ډالرو بېړنۍ مرستې اعلان کړی دی. د افغانستان لپاره د امریکا ځانګړي استازي ویلي، دغه پیسې د امریکا پراختیايي ادارې یا یو ایس اېډ له خوا لګول کېږي.
ملګرو ملتونو کې د ماشومانو د ملاتړ صندوق "یونیسف" بیا ویلي و، هرات کې د زلزلې له "۹۰ سلنه ډېر قربانیان" ښځې او ماشومان دي.
یادې ادارې دغو ښځو او ماشومانو ته د مرستو لپاره له نړیوالو مرستندویه بنسټونو د ۲۰ میلیونه ډالره مرستو غوښتنه کړې.
