چارواکي وايي ددهرات ولسوالۍ ترنيولو وروسته ځايي خلک بېرته خپلو کورونو ته راستنېږي .

د اروزگان ولايت د پوليسو مشر وايي چې له دوه اوونيو راهيسې افغان امنيتي ځواکونه د دهراوت ولسوالۍ او دې ته اړوند سيمو کې پر پوځي عملياتو بوخت ول .

همداشان دغه چارواکى وايي چې ددې عملياتو په ترڅ کې يې ددوو طالب قومندانانو په گډون لس وسله وال طالبان وژلي دي .

د اروزگان ولايت د پوليسو مشر ښاغلى همت وايي چې د طالبانو دغه دوه وژل شوي قومندانان په سيمه کې پېژندل شوې څېرې وې، چې هر وخت يې پر دولتي تاسيساتو بريدونه کول .

ښاغلى همت زياتوي چې په دې عملياتو کې يوازې دوه افغان سرتېري ټپيان شوي دي .

دى وايي:'' موږ دغه عمليات په سيمه کې د خلکو له غوښتنې سره سم پيل کړل . خلک د طالبانو له ظلم او تيري څخه تر پزې راغلي ول ، چې هره ورځ به قومي سپين ږيري او مشران موږ ته راتلل . په دې عملياتو کې زموږ د برياليتوب يوازېنى لامل له موږ سره د سيمه ييزو خلکو همکاري وه .''

همداډول د اروزگان د پوليسو مشر وويل چې د دهراوت ولسوالۍ له نيولو وروسته ښايي چې افغان سرتېري خپل پوځي عمليات هغو سيمو ته هم وغځوي چې په غالب گومان هلته وسله وال طالبان فعاليت لري .

د بېلابېلو راپورونو له مخې، د دهراوت ولسوالي اوشاوخوا سيمې په دې ورستيو کې د طالبانو له منگولو راويستل شوې دي، چې له څو کلونو راهيسې د وسله والوطالبانو په لاس کې وې .

بل پلو چارواکي دا هم وايي چې ددهراوت له ولسوالۍ څخه د وسله والوطالبانو له ويستلو وروسته به په دغه سيمه کې د بيارغاونې کارونه پيل او پراختيا ومومي .

د تېرو څو مياشتو په ترڅ کې دا درېيمه ولسوالۍ ده چې د طالبانو له لاسه وزي .

تر دې وړاندې هم له وسله والوطالبانو څخه افغان ځواکونه د فراه ولايت د گلستان ولسوالۍ او د هلمند ولايت د موسى کلا ولسواليو په نيولو بريالي شوي وو .