کبيرحقمل له کابله

	د افغانستان د کورنيو چارو وزارت هيله ښيي چې د همدې ډاډ په فضا کې به نوى کال ښه پيل او پکې به له نا امنيو سره هم پرځاى او اغېزناکه مبارزه وشي .

د دغه وزارت وياند د يادو شويو پرمختگونو لامل د افغان پوليسو د وړتياو لوړېدل ښيي .

دا په داسې حال کې ده چې په تېره نژدې يوه مياشت کې د بېلابېلو بريدونو له امله په افغانستان کې په لسگونو کسان وژل شوي دي .

ددغو بريدونو تر ټولو لوى په کندهار کې وشول، چې تر سلو ډېر خلک په کې ووژل شول .

داسې ښکاري چې د روان لمريز کال وروستۍ برخه د دغه کال د نورو برخو په پرتله افغان حکومت ته څه ناڅه له ستونزو خالي ښکاري .

د افغانستان د کورنيو چارو وزارت هيله ښيي چې د همدې ډاډ په فضا کې به نوى کال ښه پيل او پکې به له نا امنيو سره هم پرځاى او اغېزناکه مبارزه وشي .

د دغه وزارت وياند زمري بشري له خبريالانو سره په خبروکې په دې وروستيو کې د دولت ضد وسله والو پروړاندې د افغان او بهرنيو سرتېرو فعاليتونه وستايل او څرگنده يې کړه، چې يوازې د تېرې يوې مياشتې په لړکې تر٦٧ ډېر طالبان د بېلابېلو عملياتو په ترڅ کې وژل شوي دي .

	ښاغلى بشري وايي حکومتي سرتيري په تېره لنډه موده کې په دې توانيدلي، چې د هېواد په سوېلي ولايت هلمند او شمالي ولايت کاپيسا کې د طالبانو يو شمېر قومندانان ووژني او يا يې هم ژوندي ونيسي .

ښاغلى بشري وايي:" په خوښۍ سره بايد ووايو چې د کال په وروستيو څلورو مياشتو کې د افغانستان د سولې او ثبات د دښمنانو بريدونه او جنايي جرمونه مخ په کمېدو وو.
په تېره بيا په هغو ولايتونو کې چې هلته ډېر وخت نا امنۍ پېښېدې . د وضعې دغه شان پرمختگ د افغانستان د پوليسو ځواک د پياوړتيا څرگندونه کوي ."

د افغانستان د کورنيو چارو وزارت پر داسې مهال په دغه هېواد کې د ناامنيو د کموالي خبره کوي، چې نژدې هره ورځ د افغانستان له بېلابېلو سيمو نه د بريدونو او چاودنو خبرونه تر لاسه کيږي .

نژدې يوه مياشت وړاندې په کندهار ولايت کې دوه داسې بريدونه وشول، چې تر يونيم سلو ډېر کسان يې مړه او په لسگونو نور يې ټپيان کړل . همدارنگه تر هغې وروسته خوست ولايت کې هم طالبانو دوه ځانمرگي بريدونه وکړل او د کورنيو او بهرنيو سرتېرو په گډون يې عام وگړو ته هم زيانونه واړول .

که څه هم د افغانستان د کورنيو چارو وزارت راتلونکى کال د دغه هېواد د پوليسو د پياوړتيا او ښو وسلو له امله تر تېرو کلونو ښه بولي، خو بياهم ډېرى افغانان له دې امله چې د هوا په گرمېدو طالبان خپلو فعاليتونو ته زور ورکوي په اندېښنه کې دي .

طالبانو گواښ کړى چې په راتلونکي کال کې به د افغانستان پلازمېنې ته نژدې سيمې تر بريدونو لاندې راولي او په دې توگه به کابل باندې خپل فشار ډېر کړي .