لوگر ولايت د تېر ژمې په موسم کې د نورو ختيځو سيمو په پرتله ارام و، خو داسې ښکاري چې د هوا له تودېدو سره به هم په دې سيمه کې د وسله والو طالبانو بريدونه ډېر شي .

د لوگر د ولايتي بيارغونې ټيم ويانداورياخېل غرزي له بي بي سي سره په يوه ځانگړې مرکه کې پېښه تائيد کړه او وې ويل چې د بهرنيو ځواکونو څلور سرتېري د نامعلومو کوسله والو کسانو د بريد له امله ټپيان شوي دي .

پېښه د شنبې پر شپه د کابل- گرديز پر لويه لار د لوگر په مرکز پورې اړوند د پورک په سيمه کې شوې ده .

خو ذبيح الله مجاهد چې ځان د طالبانو وياند معرفي کوي د بريد مسئووليت پرغاړه واخيسته او ادعا يې وکړه، چې په دغه بريد کې شپږ تنه بهرني سرتېري وژل شوي او د هغوى دوه موټره ويجاړ شوي دي .

لوگر د کابل گاونډى سويلي ولايت دى، چې کله کله په کې دولت ضد وسله وال په کورنيو او بهرنيو ځواکونو بريدونه کوي. تېر کال د دغو بريدونو کچه لوړه وه، خو د ژمي په موسم کې ډېر لږ تر ستر گو کېدل .

طالبانو تر دې وړاندې ويلي وو، چې له راتلونکي پسرلي سره به د کابل نژدې ولايتونو کې خپل بريدونه ډېروي، خو د لوگر او پلازمېنې ته د نورو نژدې ولايتونو چارواکي دغه خبرې د طالبانو تبليغ بولي او په دغو ولايتونو کې د بشپړ امنيت ډاډ ورکوي .