عبدالحى کاکړ - دره ادم خېل ژباړن: غوث الدين فروتن

	په دره ادم خېل کې ځايي طالبانو د پاکستاني ١٥ سرتيري يرغمل کړي

يو طالب قوماندان چې د خپل نوم له ښوولو يې ډډه کوله د خپل برگ پوځي ډوله موټر په مخکينۍ څوکۍ کې کينولم. د موټر له روانېدو سره يې په عربي ژبه د نعتونو پټه چالانه کړه.

له موږ سره په موټر کې دوه نور طالب وسله وال هم ناست ول چې يوه يې درې ورځې په ويښه تېرې کړې وې. هغه لږ وروسته ويده شو، خو څنگ ته يې ناست بل طالب تر بيرته راتلو پورې هغسې گونگه روژه نيولې وه.

دوى په مخابرو باندې له يو بل سره خبرې کولې. له لږ مزل وروسته يو هيبت لرونکى ځوان چې د حماس د جنگياليو په څېر يې مخ په تور ماسک پوښلى وواو پوځي دريشي يې اغوستې وه له موږ سره په موټر کې کېناست او موږ ته د قوماندان عبدالجبار په نوم راوپېژندل شو.

د مخابرې له لارې ټولو طالبانو ته امر وشو چې په هوا کې د پوځي هليکوپترونو په اړه وخت په وخت معلومات راکړي. څومره چې زموږ موټر په يوې دنگې غرنۍ سيمه کې مخ پر وړاندې روان وو، هغومره د وېرې او ډار له امله زما د زړه دربى په ډېرېدو وو.

	د ډېرو دريشۍ په وينو ککړې وې او د ځينو په څېرو هم د وينو نښې معلومېدې

يوه طالب د دروازې له خلاصولو سره يو ږيرور مشر سرتېرى چې لاسونه يې تر شا تړل شوي وو د باندې راويوست. قوماندان د ټولو سرتېرو د راايستلو امر وکړ. له دې وروسته په کوټه کې يرغمل سرتيري يو- يو را وايستل شول.

	د ټولو سرتېرو لاسونه تر شا تړل شوي وو او د ځينو خو لا پښې هم په رسيو تړل شوې وې

هغوى ويل د پوځ سرتيري دي. په دوی کې يوۀ وويل: ''پرون (د فبرورۍ په ٢٥مه) موږ د کوهاټ تونل پر سر مورچه کې وو چې طالبانو محاصره کړو او موږ ته يې وويل چې وسلې پر ځمکه کېږدو. ما خپل مشر ته چې بيا په ډزو کې ووژل شو وويل چې تسليم به شو، خو هغه ونه منله او موږ ته يې د جگړې کولو امر وکړ. وروسته په جگړه کې اووه سرتيري ووژل شول او موږ ١٥ تنه يې يرغمل کړو''

ښايي دې سرتيرو د طالبانو له ويرې او د هغوى د خوشاله کولو لپاره ويل چې پوځ ورسره دوکه وکړه ځکه هغوى د امريکا په امر د 'مجاهدينو' په وژلو لاس پورې کړى.

يو بل سرتيري په غرېو نيولي غږ کې وويل: ''موږ نور پوځي دنده نه غواړو او خپل ټول نسل ته به هم په پوځ کې د کار کولو اجازه ورنه کړو. زما مور پيغام راليږلى وو چې د پوځ دنده پرېږدم او کور ته ولاړ شم. ما د تللو پرېکړه کړې وه چې دا پيښه رامنځ ته شوه.''

بيا هېڅکله!  موږ نور پوځي دنده نه غواړو او خپل ټول نسل ته به هم په پوځ کې د کار کولو اجازه ورنه کړو يرغمل شوي سرتيري

کله چې مې له يوۀ بل سرتيري د هغه د حالت په اړه وپوښتل نو د هغۀ غږ په ستوني کې ټپ شو او يوازې دومره يې وويل: ''ززز... زموږ حالت خو ته پخپله...........''

په دې وخت کې ټولو سرتېرو په يو اواز وويل: ''موږ ته دې له پريښودلو وروسته يوازې دومره وخت راکړل شي چې خپلې دريشۍ وباسو، له هغه وروسته به د تل لپاره له پوځ سره خداى په اماني وکړو''

په ښۀ خبر پسې راغلي خبريال ته د طالبانو له وېرې د يوۀ لړزېدونکي سرتېري هغې خبرې چې 'صيب زه دلته لمر ته يوه شېبه کېنستى شم' زما انساني عاطفه سخته وننگوله.