موسى کلا لس مياشتې مخکې وروسته له هغۀ وسله والو طالبانو ونيوله چې د دوى او برتانوي سرتېرو تر منځ پنځه مياشتنى اوربند مات شو

موسى کلا لس مياشتې مخکې وروسته له هغۀ وسله والو طالبانو ونيوله چې د دوى او برتانوي سرتېرو تر منځ پنځه مياشتنى اوربند مات شو. طالبانو قومي مشران چې د اوربند پر مهال د ولسوالۍ د چارو د پرمخ بيولو لپاره ټاکل شوي وو وشړل او واگې يې په خپل لاس کې واخيستې.

د هلمند والي اسد الله وفا بي بي سي ته وويل د ناټو او افغان ځواکونو لخوا گډ پوځي عمليات د چهار شنبې پر سهار پيل شول او موخه يې د حکومت ولکې ته د دغې ولسوالۍ بېرته ورگرځول دي.

په کابل کې د ناټو ځواکونو مطبوعاتي دفتر وايي په داسې کومو عملياتو کې دوى د خپلې ونډې په اړه څه نه شي ويلى.

له څو ورځو راهيسې اوازې وې چې بهرني ځواکونه په موسى کلا کې عمليات پيلوي او ورسره جوخت ځايي اوسېدونکو د سيمې پر پرېښودلو پيل کړى. په هلمند کې د بي بي سي خبريال عبد الصمد روحاني وايي په سلگونو کورنۍ هڅه کوي چې له سيمې څخه پښې سپکې کړي. ډېرى خلک د ولسوالۍ د مرکز له شاوخوا کليو څخه مخ په دښتو يا ښارونو روان شوي دي.

سيمه ييز اوسېدونکي وايي بهرنيو ټانکونه د ولسوالۍ تر شاوخوا راتاو شوي دي، خو جگړه لا نه ده پيل شوې.

تېر کال د برتانوي پوځيانو او وسله والو طالبانو تر منځ اوربند او بيا وروسته د طالبانو لخوا د ولسوالۍ نيول کېدلو د ناټو ځواکونو سخت تر نيوکو لاندې راوستل. پر دغې ولسوالۍ جوړجاړى هلته له تر ټولو سختو جگړو او د دوو لوريو تر منځ له مخامخ نښتو وروسته وشو.

موسى کلا په وروستيو کې د رسنيو لخوا تل د طالبانو د بياراڅرگندېدو د خبرداريو په سر کې يادېده. موسى کلا يوازېنۍ ولسوالۍ نه ده چې په سويل کې د طالبانو په ولکه کې ده، بلکې افغان چارواکو خپله منلې چې څو وسله وال طالبان په ولسواليو کې واکمن دي.