خپلواک ساپى کابل

	ناټو : ډاډ لرو چې موسى کلا به بيرته د حکومت تر ولکې لاندې راځي

په کابل کې د دغو ځواکونو وياند خبريالانو ته دا هم ويلي چې د ولسوالۍ په بيرته نيولو کې اوسنى ځنډ د ملکي تلفاتو د مخنيوي د لارو چارو د ارزولو له اړخه دى . وياند دا هم ويلي چې دوى د سيمي حالات په کلکه څاري ا و تر اوسه يې دغلته د طالبانو د اضافي ځواکونو د ورتلو څه نښې نښانې نه دي موندلي .

طالبانو پر دغه ولسوالي تيره اونۍ بريد وکړ، حکومتي بيرغ يې راکوز کړ او د ولسوالۍ ودانۍ يې ړنگه کړه. په دې سره د سولې هغه تړون مات شو چې له مخې يې د ولسوالۍ چارې له اوس نه څلور مياشتې وړاندې سيمه يزي شورا ته سپارل شوې وې .

د ناټو په مشرۍ د نړيوالو مرستندويه امنيتي ځواکونو ISAF سرچينې دا مني چې په هلمند کې د موسى کلا ولسوالۍ کنټرول لا هم د طالبانو په لاس کې دى . له دې سره جوښت دغه سرچينې د سيمې ظاهري حالات ارام ښيي او وايي چې تر اوسه دغې ولسوالۍ ته د طالبانو د اضافي ځواکونو د ورتلو او ځايي اوسيدونکو ته د کوم جدي گواښ نښې نښانې نه دي ليدل شوي .

په کابل کې د ISAF د ځواکونو نوي پوځي وياند تام کولينس د احتمالي نښتو له ويرې له سيمې د ملکي وگړو د کډه کيدو کچه هم تر هغه څه ډيره ښکته وښوده چې په رپوتونو کې يې يادونه کيږي .

وياند يوازې د ٢٠٠ وگړو د بيځايه کيدو خبره وکړه . خو سيمه يز خبريالان او ځايي اوسيدونکي دغه شميره د ١٠٠٠ او ١٥٠٠ په مينځ کې ښيي .

د ISAF دغه وياند د طالبانو له ولکې نه د موسى کلا د بيرته ويستولپاره د ځواکونو د بشپړ چمتو والي خبره هم وکړه . خو په دې اړه يې وروستۍ پريکړه پخپله په افغان حکومت پورې تړلې وبلله .

(( په دې کې حکومت لارښود دى او موږ د حکومت ملاتړي يو . موږ ډاډ لرو چې موسى کلا به د وخت له اړخه له نيول کيدونکي تصميم سره سم بيرته د حکومت په ولکه کې راځي . د بريد مهال به حکومت ټاکي . خو دا هم بايد له ياده ونه باسو چې په موسى کلا کې ملکي وگړي اوسي او ښايي په غبرگون کې بيړه ملکي تلفات رامينځ ته کړي . دا هغه څه دي چې افغان حکومت او ايساف يې نه غواړي . ))

ها خوا د ځايي حکومتي ادارې د چارواکو له قوله په رپوټونو کې داسې اشارې ورکړل شوي چې حکومت گواکې ډير ژر د هلمند پر دغې نانديزې ولسوالۍ د بريد تکل لري .

خو د طالبانو سرچينو هم په خپل وار گوت څنډنه کړې چې مقابلې ته تيار دي او له موسى کلا به ونه ووځي . دغه څرگندونې ددې نښه ده چې موسى کلا ته دواړه غاړې د خپل ځواک او اعتبار د ازميښت په سترگه گوري ، نو ځکه خو په سيمه کې د سختو او پراخو نښتو د پيليدو له اړخه د ځايي اوسيدونکو انديښې له پامه نشي لويدى .

البته دا د هيواد په سوويل کې يوازې د موسى کلا ولسوالي نه ده چې د سيالو غاړو تر مينځ د يوه بل ځل لپاره د مقابلې په تاوده ډگر بدليدونکې ده . خو له نورو سيمو سره د دغې ولسوالۍ توپير په دې کې دى دغلته واک ځايي قومي مشرانو ته سپارل شوى وو او دا د ثبات د راوستو يوه نوي تجربه بلل کيده .

طالبان پر ولسوالۍ د بريد دليل له قومي مشرانو سره له شوي تړون نه د ناټو سرغړونه بولي . خو وياند کولينس د بريد لامل د طالبانو له لورې د واک د ډيريدو له هڅې سره د قومي شورا مخالفت گڼي .

(( حقيقت دا دى چې دغلته د قومي شورا او هغو طالب مشرانو تر مينځ چې پر ولسوالۍ د خپل واک او کنټرول ډيريده غواړي ، سخته ترينگلتيا رامينځ ته شوې وه . د شوې موافقې له مخې قومي شورا د طالبانو دغه غوښتنه نه شوه منلى . پايله دا شوه چې طالبانو پر ولسوالۍ بريد وکړ او په دې توگه يې په څرگنده د ځايي مشرانو سپکاوى وکړ . ))

د موسى کلا د سولې د تړون د پايښت په اړه هم نظرونه ويشلي دي . ځينې دغه تړون پاى ته رسيدلى بولي خو حکومت لا تر اوسه په دې اړه پريکنده دريځ نه دى ښودلى .

د ISAF چارواکي بيا دا گڼي چې که حکومت د تړون دوام وغواړي نو دوى به يې ملاتړ وکړي خو که حکومت تړون پاى ته رسيدلې وبولي نو دوى ته به هم بې اعتباره وي