ايتلافي ځواکونه وايي د عملياتو له پاى ته رسېدو وروسته پوه شول چې ولسي خلک د ډزو په ادلون بدلون کې وژل شوي

سيمه ييزو چارواکو دپيښې پخلى کړى او ايتلافي ځواکونو ويلي چې ولسي خلکو ته د جگړې په ترڅ کې مرگ ژوبله اوښتي ده.

د ايتلافي ځواکونو په يوه خبرپاڼه کې ويلي چې دوى د باوري معلوماتو پر بنسټ په بټي کوټ کې پر يوۀ کور عمليات وکړل چې پکې يوۀ اورپکي ځان پټ کړى و. خبرپاڼه وايي کله چې دوى کور ته ننوتل، مشکوک اورپکي ډزې پيل کړې او خپله کورنۍ يې هم له ځان سره د جگړې په ځاى کې ساتلې وه. خبرپاڼه زياتوي چې دوى د جگړې له پاى ته رسېدو وروسته پوه شول چې دوه ماشومان هم وژل شوي، يوه ښځه او يو بل ماشوم ټپيان شوي دي.

دننګرهار دپوليسو وياند سمونوال عبدالغفور بي بي سي ته وويل د ايتلاف دځواکونو په ډزو درې تنه وژل شوي چې يو تر ٧٠ کلونو زيات بوډا، يوه پيغله نجلۍاو يوهلک دى. دۀ وويل له دغۀ کور څخه درې نور کسان د بهرنيو ځواکونو لخوا بيول شوي دي.

که څۀ هم ځايي چارواکي نه وايي چې په نښه شوي او نيول شوي کسان له چا سره تړلي وو، خو د سيمې خلک له يوې مخې وژل شوي او نيول شوي کسان عادي خلک بولي او وايي چې له کومې مخالفې ډلې سره يې تړاو نه لارۀ.

هاخوا، د کندهار ښار ته نژدې په ارغنداب ولسوالۍ کې د وسله والو طالبانو او افغان او بهرنيو ځواکونو تر منځ جگړه تر ډېره پاى ته رسېدلې ده. د دغې ولسوالۍ ډېرى سيمې درې ورځې مخکې وسله والو طالبانو نيولې وې. دوى آن ښار ته څېرمه د باغ پول سيمې ته هم رسېدلي ول. سيمه ييز چارواکي په جگړه کې د لسگونو طالبانو د وژلو ادعا کوي.

خبريالان وايي که څۀ هم طالبان به د اوس لپاره له ارغنداب څخه پر شا شوي وي، خو دا د دوى پياوړتيا ښيي چې آن د ښار لمنې هم گواښلى شي.