حنان حبيبزى له کابله

	افغان پوليس وايي هڅه کوي چې د٥٠٠٠ تنو سرتيرو په ځاى په ځاى کولو سره د اختر په ورځو کې د کابل امنيت ډاډمن کړي

د کورنيو چارو وزارت وياند زمري بشري خبريالانو ته وويل چې دغه پوليس به د اختر د ورځې له پيله تر٢٤ ساعتونوپورې په ښار کي خپاره پاتې وي.

ده دکابل پر ښاريانو غږ وکړ چې د اختر په اوږدو کې له پوليسو سره مرسته وکړي .

ده پنځه نوې بيړنۍ ټليفوني نمرې رسنيو ته وويشلې چې د کابل ښاريانو ته ورسيږي او خلک په اسانۍ سره وکولى شي د کابل د امنيې له چارواکو سره اړيکي ټينگ کړي.

ښاغلي بشري وويل پوليس دغه گام ددې لپاره پورته کوي چې د کابل په ښار کې عامه امنيت او ټيکاو وساتل شي.

د افغانستان د کورنيو چارو وزارت د کابل دټيکاو د ټينگښت لپاره د يو لړ نورو امنيتي گامونو د پورته کولو اعلان وار له مخه کړى دى.

تيره اونۍ د ترهگرۍ په وړاندې د کورنيو چارو په وزارت کې د مبارزې ريس جنرال عبدالمنان فراهي وويل چې د پوليسو ادارې د کابل په ښار کې دداسې امنيتي کړۍ پر جوړولو بوخت دي چې ټوليز امنيت ډاډمن کړي.

دافغان پوليسو دې جنرال وويل چې دغه گام دولسمشر حامد کرزي د مخامخ لارښونې له مخې پورته کوي.

خو داچې ددې بڼه به څه ډول وي -تر اوسه د کورنيو چارو وزارت ډير جزيات نه دي خپاره کړي.

دکابل په ښار کې د امنيتي حالت په اړه له هغې وروسته انديښنې ډيرې شوې چې د روزې د مبارکې مياشتې په اوږدو کې څلور پرله پسې ځانمرگو بريدونو لسگونو تنه ووژل چې ډيرى يې د پوليسو او ملي پوځ افسران وو.