بي بي سي پښتو وېبپاڼه کابل

	په پکتيکا ولايت کې د تاوتريخوالي پېښې وخت په وخت کېږي چې وسله وال طالبان او افغان يا بهرني ځواکونه پکې ښکېل وي

سيمه ييز چارواکي وايي د خوشامند ولسوال حبيب الله له خپل موټر چلوونکي سره تېر ماښام هغه مهال ووژل شو چې د وسله والو طالبانو تر بريد لاندې راغى.

د ولسوال د وژلو خبر لومړى طالبانو ورکړ. د طالبانو يوۀ وياند وويل دوى ولسوال له خپلو څو تنو ساتونکو سره په يوۀ کمين کې له پښو غورځولى او د هغۀ گاډى او وسلې يې له ځان سره وړي دي.

د سويل ختيځ زون د پوليسو وياند سمونوال گل محمد منگل بي بي سي سي ته وويل د خوشامند ولسوالۍ ولسوال هغه مهال ووژل شو چې له خپلې سيمې څخه ښرنې ته پر لاره په ډېله ولسوالۍ کې د طالبانو له ناڅاپي بريد سره مخامخ شو.

دۀ وويل له کمين وروسته د افغان ځواکونو چې د بهرنيو ځواکونو ملاتړ ورسره دى او وسله والو طالبانو ترمنځ جگړه نښتې ده او په سيمه کې پوځي عمليات پيل شوي دي.

ښاغلي منگل وويل د نښتې په ترڅ کې دوه تنه وسله وال طالبان هم ژوندي نيول شوي دي.

د پکتيکا د والي يوۀ وياند بيا د پېښې بل ډول تعبير ورکړ. دۀ وويل د تېر ماښام په کمين کې دوه پوليس وژل شوي، خو د ولسوال له وژل کېدلو يې ناخبري وښوده.

د افغانستان په سويل ختيځ کې په وروستيو مياشتو کې تاوتريخوالى زيات شوى، چې وخت په وخت پکې د طالبانو او بهرنيو يا افغان ځواکونو ترمنځ نښتې کېږي.