عبد المتين سمسور له کابله

	ښاغلي وردگ بي بي سي ته وويل چې په اسلام اباد کې د سرۀ جومات لانجې د پاکستاني پلاوي چمتووالى پڅ کړى

له مهالوېش سره سم د امن جرگه بايد د روان کال د اگست د مياشتې په پيل کې جوړه شوې واى.

خو د دغې سيمه ييزې جرگې د افغانستان د لورې د چمتووالي کمېسيون د دارالانشا مشر، فاروق وردگ، وايي تر يوې اوونۍ پورې ښايي جرگه وځنډول شي.

اټکل کيږي چې په دغې جرگې کې په سيمه او افغانستان کې د ترهگرۍ په وړاندې مبارزه کې د هڅو پر همغاړې کولو خبرې وشي .

افغان لورى هيله لري چې جرگه به په دې اړه اړينې پريکړې وکړي . خو دا په داسي حال کې ده چې په پاکستان کې يوشمير کسان بيا دجرگې پايلو ته ډيره خوشبينې نه لري .

ښاغلي وردگ په يوې ځانگړې مرکه کې بي بي سي ته وويل چې د پاکستان په دننه کې، په ځانگړې توگه په اسلام اباد کې، وروستۍ پرمختياوې کېداى شي د امن جرگه تر يوې اونۍ پورې وځنډوي.

دۀ وويل د پاکستان د لورې د تخينکي چمتووالي ډلې دوى ته ويلي چې په اسلام اباد کې د سرۀ جومات لانجې د حکومت لومړيتوب داخلي امنيت ته اړولى او دا کېداى شي د دوى تياري سوکه کړي.

د پاکستاني لورې د ورو چمتووالي په لړ کې، ښاغلي وردگ له هغې خوا څخه په جرگه کې د گډونوالو د رسمي نوملړ د نه سپارلو يادونه وکړه، چې بايد پخوا شوى واى.

د امن پر سيمه ييزې جرگې افغان او پاکستاني ولسمشرانو په تېر سپتمبر کې په واشنگنټن کې د امريکا د سفر پرمهال هوکړه کړې وه.

د دغې جرگې د جوړېدو او څرنگوالي په اړه تر ډېره جزيات نه ورکول کېدل. خو اوس چې د چمتووالي وروستۍ ورځې دي، افغان چارواکي وايي په دغې جرگې کې به د افغانستان لخوا ښځينه استازي هم گډون کوي.

ښاغلي وردگ وويل دوى به د جرگې په پاى کې د ملگرو ملتونو استازې هم د څارنې لپاره راوغواړي که څه هم پاکستاني لورې تر اوسه دا خبره نه ده منلې.

د سيمه ييز امن د جرگې موخه په افغانستان کې د اورپکو د فعاليتونو او له بهره د دوى د راوښتلو د مخنيوي لپاره د لارو چارو لټول ښوول شوي.