لوګر کې د "طالبانو د والي په ګډون ۱۳" تنه وسله وال وژل شوي
د عکس سرچینه، f
د افغانستان د کورنيو چارو وزارت وايي د يو لړ عملياتو په ترڅ کې يې د لوګر ولايت لپاره د طالبانو له خوا نومول شوی والي نجيب الله د دغې ډلې له ۱۲ تنو غړو سره يو ځای وژلی دی.
د لوګر والي حليم فدايي نن دوشنبې (۱۳ جون) پر خپل ټوېټر پاڼه هم د دغې پېښې پخلی کړی دی.
د افغانستان د کورنيو چارو وزارت په خبرپاڼه کې راغلي، چې د ځانګړو ځواکونو د يو لړ عملياتو په ترڅ کې د "طالبانو ۱۳ جنګيالي" وژل شوي دي.
د دغې خبرپاڼې له مخې پوځي عمليات د لوګر ولايت په پيروخيل او بابوس سيمو کې شوي دي. چارواکي وايي، پوليسو او ولسي وګړو ته په دغو عملياتو کې کوم زيان نه دی رسېدلی.
د کورنيو چارو وزارت وايي په دغو عملياتو کې يو شمېر وسلې او مهمات هم د پوليسو لاس ته لوېدلي دي.
ياد شوی وزارت وايي، دغو کسانو غوښتل چې په لوګر ولايت کې د "ترهګرۍ کړنې" ترسره کړي.
طالبانو تراوسه په دې اړه څه نه دي ويلي.
