د بېړۍ اوښتو ۲۴ افغان کډوال وژلي
د راپورونو تر مخه د ترکیې مرکزي ښار استانبول په شمالي ساحل کې د کډوالو بېړۍ اوښتو له امله لږ تر لږه ۲۴ کډوال وژل شوي او ډېر نور لادرکه دي.
وېل کېږي وژل شوي کسان ټول افغان کډوال دي.
د ژوندیو کسانو موندلو او مړیو راایستو عملیات پیل شوي.
ژغورونکې ډلې د اوبو له لاندې د مړیو په را ایستلو بوختې دي.
په بېړۍ کې ۴۰ کسان سپاره و چې ډیری یې افغانان او د سوریې کډوال و.
په وژل شویو کې ښځې او ماشومان هم شامل دي.
د ژغورنې ډلې یوه غړي علي ساروهان هریت ورځپاڼې ته وویل:
"هوا زموږ کار له مشکل سره مخامخ کړی، دا یوه کوچنۍ بېړۍ وه او دوی په کې ۴۰ کسان سپاره کړي وو. موږ د ماشومان مړي وینو چې د اوبو پر سر بهیږي"
د عکس سرچینه، AFP
تر اوسه لا نه ده په ډاګه چې دغه بېړۍ ولې چپه شوې.
د رپوټونو تر مخه د شمالي ساحل په دې ساحه کې د بېړۍ سفر غیر عادي دی.
داسې ویل کېږي چې کډوالو غوښتل رومانیا ته ځان ورسوي چې د اروپايي ټولنې غړی هېواد دی.
ډیری کډوال تل په دې هڅه کې وي چې له یوه نه یوه لارې د اروپايي ټولنې غړو هېوادونو ته ځان ورسوي.
دوه میاشتې وړاندې د کډوالو یوه بله ډله چې ډیری يې د سوریې او افغانستان وو د ترکیې د سمندري ځواکونو له خوا وژغورل شول.
