د لندن سرمشريزې څه لرل؟
- Author, ايمل پسرلى
- دنده, لندن
د لندن د سرمشريزې تر پيل وړاندې لا ويل شوي و چې دلته به مشران د افغانستان د سولې د بهير پر غوړولو خبرې کوي.
د روان کال په پيل کې د لندن ورته بلې سرمشريزې له يوه بل پاکستاني لومړي وزير سره هم پر سولې خبرې درلودې.
هيلې وې خو په عمل کې څه تر سترگو نه شول.
د سه شنبې په ورځ( د اکتوبر ٢٩) د برتانيا، افغانستان او پاکستان ترمنځ په نوې سرمشريزې کې هم له وسله والو طالبانو سره پر خبرو خبرې وشوې.
مشرانو ومنل چې د پاکستان لومړى وزير به ژر کابل ته ورځي چې پر دغه بهير نورې خبرې وکړي.
د افغانستان د سولې عالي شورا به پاکستان ته ځي چې د ملا محمد عمر پخوانى مرستيال ملا عبدلغني برادر مخامخ وويني.
ملا برادر له درې کلن قيد وروسته د افغانستان په غوښتنه پاکستان خوشي کړ خو کابل تر اوسه ويل چې مخامخ ورسره د خبرو موقع نه لري.
په پاکستان کې د طالبانو د پناه ځايونو خبره هم افغان غاړې بيا ياده کړه.
غوښتنه دا وه چې د دغو پټنځايونو پر ضد پوځي عمليات وشي.
خو تر دغه ډول يوه عمل وړاندې به لومړى د کابل او اسلام اباد پوځي جنرالان پر پايلو خبرې کوي.
نواز شريف
د سه شنبې د ورځې په سرمشريزه کې د اقتصادي اړيکو په پراخولو ډير ټينگار وشو.
د روان کال د مى په مياشت کې د لومړي وزير د دندې تر پيل وړاندې لا نواز شريف ويلي و چې اقتصاد ته به يې ځانگړى پام وي.
هغه وخت ځينو کارپوهانو ويل چې ښايي اقتصادي ودې ته پام به د افغانستان له ثبات سره تر پخوا د پاکستاني ملکي مشرتابه دلچسپي ډيره کړي.
پاکستان په کور دننه د انرژۍ له سخت کمښت سره مخامخ دى.
اسلام اباد د افغانستان له لارې د منځنۍ اسيا برېښنا او غاز غواړي.
د لندن په سرمشريزه کې د کونړ پرسيند د بند جوړولو او د برېښنا پر گډ توليد خبرې وشوې.
د دغه بند ډير جزييات څرگند نه دي خو ويل کيږي چې اسلام اباد ته د ولسمشر کرزي په وروستي سفر کې هم پرې خبرې شوې وې.
افغانستان د دغه بند د جوړولو لپاره پيسې نه لري.
پاکستان ظاهرآ دا پيسې ورکوي او په بدل کې غواړي چې تر يوې اوږدې مودې پورې له دغه بنده د توليد شوې برېښنا ډيره برخه واخلي.
په سرمشريزه کې وپتېل شوه چې لومړى وزير نواز شريف به ژر کابل ته سفر کوي، د دې سفر په ترڅ کې به د سولې بهير اصلي خبره وي خو د اقتصادي اړيکو د لا پراخولو پر موضوع به هم په جزيياتو خبرې کيږي.
د کونړ پر سيند د برېنښا بند، له ترکمنستانه پاکستان او هند ته د افغانستان له لارې د غازو نلليکه او له منځنۍ اسيا پاکستان ته د برېښنا لېږد به ياديږي.
اقتصادي دلچسپيو او اړتياو ته په پام سره ځينې په دې باور دي چې د لندن دا وروستۍ سرمشريزه ښايي تر پخوانو بريالۍ وي.
