'سږ کال د پوهنې وزارت ۱۰۰ کارکوونکي وژل شوي'
تېره اوونۍ په دريو ولایتونو کې د ناپیژاندو وسله والو له لوري د معارف د مدیرانو له وژل کېدو وروسته د پوهنې وزارت د معارف د منسوبینو د امنیت په اړه اندېښنه په ډاګه کړې ده.
چارواکي وايي د روان هجری لمریز کال له پيله د پوهنې وزارت له ۱۰۰ زیات کارکوونکي په جګړو او هدفي وژنو کې وژل شوي.
سميع الله موسی زی په خپل راپور کې وايي، د پوهنې وزارت له امنیتي ارګانونو غواړي چې د کارکوونکو امنیت ته يې جدي پام وکړي.
دوی د دغو وژنو پړه د پوهنې پر دښمنانو اچوي او دا کړنه د دوی له خوا د پوهنې د منسوبینو په منځ کې د ویرې خورلو نوی تکتیک بولي.
چارواکي وايي دوی وروسته له هغه دې تکتیک ته مخه کړه چې د زده کوونکو مسمومولو او د ښوونځیو سوځولو د دوی له تمې سره سم پایلې نه لرلې.
د وژنو په دې لړۍ کې تېره اوونۍ په پروان، ارزګان او هرات ولایتونو د پوهنې درې مدیران د نامعلومو وسلوالو له خوا ووژل شول.
د دې درې واړو د وژنې مسؤولیت چا په غاړه نه دی اخستی، خو له دې وړاندې افغان چارواکو د دا ډول کړنو مسؤول وسله وال طالبان بلل.
د امنیتي ستونزو له امله له دوه نیم ملیونه زیات ماشومان له زده کړې بې برخې دي او ۴۳۰ ښوونځي په سویلي او سویل ختیځو سیمو کې تړلي دي.
خو له دې ستونزو سره، سره افغانستان په تېره څه باندې یوه لسیزه کې د پوهنې په برخه کې د پام وړ پرمختګ کړی.
۴۳۰ ښوونځي تړلي
همدا اوس څه باندې ۹ ميلیونه زده کوونکي ښوونځیو ته ځي او چارواکي وايي د معارف دښمنان هڅه کوي د دې پرمختګ مخه ډب کړي.
د کابل پوهنتون استاد داود راوش وايي که په هېواد کې د پوهنې پر وړاندې پرتې ستونزې هوارې نه شي نو د پرمختګ پر ځای په شاتګ ته لاره هوارېږي.
افغانستان یو له هغو هېوادونو دی چې د پوهې کچه په کې ټیټه ده او د پوهنې په برخه کې له ډیرو خنډونو او ستونزو سره لاس او ګریوان دی.
طالبانو د خپلې شپږ کلنې واکمنۍ پرمهال نجونې ښوونځيو ته نه پرېښوولې، خو اوس چې د افغان زده کوونکو لپاره ښوونځيو ته د تګ زمینه برابره شوې نو د پوهنې بهیر له دا ډول ستونزه سره مخامخ دی.
د پوهنې د برخې کارپوهان وايي په هېواد کې د پوهنې بهیر له جدي امنیتي ستونزه سره مخامخ دی او دولت ته په کار دي چې په دې برخه کې کوټلي ګامونه پورته کړي.
