کابل کې د پاکستان پر سفارت بريد؛ "يو امنيتي ساتونکی ټپي شوی"
د عکس سرچینه، PAK EMBASSY
د افغانستان پلازمېنه کابل کې د پاکستان پر سفارت وسله وال بريد کې يو امنيتي ساتونکي سخت ټپي شوی دی.
د پاکستان حکومت په وينا د دې بريد موخه په کابل کې د پاکستان سفارت چارسمبالي عبيدالرحمان نظاماني و چې هغه ته کوم زيان نه دی اوښتی.
د يادونې وړ ده چې عبدالرحمن نظاماني د تېرې نومبر مياشتې په څلورمه نېټه په کابل کې پاکستان سفارت کې د ماموريت چارې پر غاړه واخيستې.
د کابل د پولیسو وياند خالد ځدراڼ پو ټوېټر پاڼه لیکلي، د کابل ښار د کارته پروان سيمه کې د پاکستان سفارت پر لور له يوې ودانۍ ډزې شوې. نوموړی زياتوي په دې اړه يو مشکوک کس هم نيولی دی.
د پاکستان د بهرنیو چارو وزارت هم په یوه خبرپاڼه کې ویلي، چې په کابل کې د پاکستان د سفارت پر ودانۍ په برید کې عبیدالرحمن نظاماني په نښه شوی دی.
د پاکستان لومړی وزیر شهباز شریف وايي په کابل کې یې شازدافير له مرګوني بریده روغ وتلی.
نوموړي پر ټویټر ليکلي د دغې پېښې د بېړنۍ پلټنې او د عاملینو د سزا غوښتنه کړې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د طالبانو د بهرنيو چارو وزارت هم دا بريد غندلی او وايي امنيتي ادارې به دغه پېښه وڅېړي.
د طالبانو د بهرنیو چارو وزرات ویاند قهار بلخي پر خپله ټویټر پاڼه لیکلي په کابل کې د پاکستان د سفارت پر لور د ډزو او ناکامه برید هڅه په کلکو ټکو غندي. دوی وايي هیڅکله به د دوی په ټکو مغرضو کړیو ته اجازه ورنه کړي چې په کابل کې د دیپلوماتيکو ماموريتونو امنيت وګواښي.
پاکستاني رسنیو د طالب سرچینو له قوله ليکلي چې په کابل کې د پاکستان د سفارت پر سرپرست عبیدالرحمان نظاماني سفارت ته له څېرمه له يوې ودانۍ ډزې شوې دي.
تراوسه د دغه بريد مسووليت چا پر غاړه نه دی اخيستی.
په افغانستان کې د ملګرو متلونو استازولی يوناما د پاکستان پر سفارت دغه بريد غندلی او ټپيانو ته يې د ژر ښه کېدو هیله څرګنده کړې ده.
د عکس سرچینه، Getty Images
په ورته وخت کې د امریکا د بهرنیو چارو وزیر انتوني بلېنکن په یوه اعلامیه کې ویلي، هېواد یې د هغو ترهګرو ډلو د ګواښونو خلاف هر ډول ګامونو اوچتولو ته ژمن دی چې له افغانستانه فعالیت کوي. هغه په ځانګړي ډول د القاعدې د هند نيمې وچې برخه او تحریک طالبان پاکستان نومونه یاد کړي.
انتوني بلېنکن ټینګار کړی، دا ګام يې د هغو جدي هڅو برخه ده چې دا ډاډ تر لاسه شي چې نړیوال ترهګر افغانستان د یوه مرکز په توګه نه کاروي.
طالبانو لا د امريکا دغه اعلان ته غبرګون نه دی ښودلی خو له دې وړاندې يې له افغانستانه نړۍ ته د ترهګرۍ د هر ډول ګواښ د متوجه کېدو خبرونه رد کړي وو.
پرون د امریکا د بهرنیو چارو وزارت د القاعدې د هند لویې وچې څانګې او د پاکستاني طالبانو غورځنګ څلور مشران د نړیوالو ترهګرو په ځانګړي نوملړ کې شامل کړل.
