کابل هوايي ډګر کې د قطر تخنيکي ډلې ماموريت پای ته ورسېد
د عکس سرچینه، Getty Images
په افغانستان کې د قطر سفارت ویلي د کابل هوايي ډګر کې د دغه هېواد د تخنیکي ډلې کار پای ته رسېدلی. سفارت دې ډلې د نړیوالو سټنډرونو سره سم د دغه هوايي ډګر په رغولو کې مرسته کړې ده.
د دغه ډلې ماموریت وروسته له هغه پای ته رسېږي چې د طالبانو حکومت له یوه اماراتي شرکت ګاک ( GAAC) سره تړون لاسليک کړی دی. دا شرکت به د افغانستان د څو هوايي ډګرونو او هوايي چلن مسؤولیت پر غاړه لري.
کابل کې د قطر سفارت پر ټوېټر یوه بیان کې کابل هوايي ډګر کې د خپل ځانګړي تخنیکي ډلې ماموریت د پای ته رسېدو ترڅنګ ویلي، دې ډلې د نړیوالو معیارونو سره سم د کابل هوايي ډګر بیارغونه کې مرسته کړې ده. سفارت ویلي دا بیا رغونه افغانستان ته د بشري او پرمختیايي مرستو رسولو او هوايي چلن عادي کولو لپاره ډېره اړینه وه.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د تېر کال اګست میاشت کې د بهرنیو ځواکونو له وتلو وروسته ترکیې او قطر په ګډه د کابل هوايی ډګر د بیارغولو چارې پرمخ وړلې.
د طالبانو حکومت کې د بهرنیو چارو وزارت هم یوه بیان کې دا یو بشري او تاریخي ماموریت بللی. بیان زیاتوي چې دې تخنیکي ډلې د طالبانو بیا واک ته رسېدو وروسته د کابل هوايي ډګر په بیا پرانیستلو او فعال ساتلو کې مهم رول درلود.
تېر کال ویل کېدل چې قطر او ترکیه به د کابل هوايي ډګر د چارو پرمخ بیولو مسؤولیت پر غاړه ولري. پر کابل د طالبانو له ولکې یوه میاشت وروسته د قطر د بهرنیو چارو وزیر محمد بن عبد الرحمن آل ثاني ویلي وو تر هغه چې د طالبانو په ګډون د ټولو خواوو هوکړه شوې نه وي قطر د کابل هوايی ډګر مسؤولیت پر غاړه نه اخلي.
نوموړي ویلي ټولې مسلې به ارزول کېږي او ډاډ به تر لاسه کوي که داسې نه وي او ټولو اړوندو مسلو ته د حل لار پيدا نه شي قطر دا مسؤولیت نه شي منلی.
خو د روانې سپټمبر میاشتې پر اتمه د طالبانو چارسمبالي حکومت د ګاک په نوم اماراتي شرکت سره د لسو کلونو لپاره تړون لاسلیک کړ.
په پام کې ده دا شرکت د څو هوايي ډګرونو او هوايي چلند چارې تنظیم ترڅنګ دې برخه کې مسلکي کسان وروزي.
طالب چاروکو ویلي وو د دې پروژې له پلي کېدو سره هغو الوتکو ته، چې دا افغانستان له فضا تېرېږي او یا د هېواد په ډګرونو کې ناسته کوي د هوايي لارښوونو چوپړتیاوې له نړیوالو معیارونو سره سمې وړاندې کېږي."
د طالبانو بیا واک ته رسېدو سره نړیوالو هوايي شرکت افغانستان ته عادي الوتنې بندې کړي او د افغانستان له هوايي حریمه هم د پخوا پر تله ډېرې کمې الوتنې کېږي.
