د هند یوه ښار عامه ځایونو کې د مسلمانانو عبادت پر سر ناندرۍ راپورته شوې

درې میاشتې کېږي چې د ګورګاون په نوم عصري ښارګوټي کې د هندوانو یوه ډله هره جمعه د لمانځه پرمهال هڅه کوي مسلمانان پرینږدي چې عامه ځایونو لکه خالي ځمکو، د موټرو تمځایونو، حکومتي ځمکو او فابریکو ته نږدې سیمو کې د جمعې لمونځ ادا کړي.

د دې هندو ډلې یو مشر وايي دوی د مسلمانانو او یا د لمانځه ضد نه دي، خو دا چې دوی عامو ځایونو کې لمونځ کوي دوی ته د ځمکې غصب د یوې هڅې په مانا ده.

دوی ادعا کوي چې دا ''د نکاح جهاد '' په څېر ''د ځمکې جهاد '' دی.

یو شمیر هندوان وايي هند کې مسلمانان هندوانې ښځې د مسلمانولو په نیت نکاح کوي او دې ته یې د نکاح جهاد نوم ورکړی اوس دوی وايي دا د ځمکې جهاد دی.

خو هندي مسلمانان بیا وايي دا د دوی په اړه په خلکو کې د ویرې اچولو یوه بله هڅه ده.

د دې ستونزې د هواري او د شخړې د پراخېدو مخنیوي په موخه پولیس لاس په کار شوي او د لمانځه پر مهال د ځايي مسلمانانو ساتنه کوي.

په ګورګاون کې د مسلمانانو د یوې ټولنې بنسټ ایښودونکي الطاف احمد ویلي، دا ډېر ویروونکی حالت دی، دی وايي په ګورګاون کې مو د داسې یو څه تمه هیڅکله نه لرله.

ګورګاون د نوي ډیلي په سویل کې په ۱۵ میله واټن کې موقعیت لري، له درې لسیزو په کمه موده کې دې سیمې د یوه پرمختللي او عصري ښار بڼه خپل کړې ده.

ښکلې دنګې ودانۍ، عصري مغازې او د اوسېدو لوړ پوړیزې ودانۍ لري.

دې ښار کې له یو ملیون زیات کسان اوسېږي او د هند له نورو سیمو ګڼ کسان د کار لپاره ورځي.

په دې ډله کې یو زیات شمېر یې مسلمانان دي.

مسلمانانو وايي ځکه په عامو ځایونو او خالي میدانونو کې دجمعې لمونځ کوي چې د جمعې لمانځه لپاره لوی ځایونه نشته او دوی اړ دي چې داسې سیمو کې د لمانځه لپاره راټول شي.

ګورګاون کې مسلمانان وايي د دې ښار په پلان کې د سکانو لپاره له څلویښت زیات معبدونه او ۱۸ سپیڅلي ځایونه په پام کې نیول شوي، خو د جومات لپاره یوازې یوه ځای کې یوه ټوټه ځمکه بېله شو ې ده.

دوه کاله وړاندې د مسلمانانو یوې ټولنې هڅه وکړه یوه ټوټه ځمکه واخلي خو د یو لړ ستونزو له امله یې ونکړی شول.

خو په ګورګاون کې ټول هندوان او سکان له مسلمانانو سره دا وړ چلن نه کوي.

یوه ځايي اوسېدونکي هندو مسلمانانو ته اجازه ورکړې وه چې د ده په تجارت خونه کې لمونځ وکړي.

سکانو تېره میاشت وړاندیز وکړ چې مسلمانان دې د دوی په عبادت ځایونو کې لمونځ ادا کړي، خو د هندو ډلو له اعتراضونو وروسته اړ شول چې له دې پرېکړې لاس په سر شي.