یونېسف: له څلور میلیونه ډېر افغان ماشومان ښوونځي ته له تلو بې برخې دي
د عکس سرچینه، Getty Images
په ملګرو ملتونو کې د ماشومانو ملاتړ اداره یونېسیف مسوولین وايي، له څلور میلیونو ډېر افغان ماشومان ښوونځي له تلو محروم دي. یونېسیف په یوه ټویټر پیغام کې ویلي، له زدکړو د محرومو افغان ماشومانو له نیمايي زیات شمېر نجونې دي.
د دې ادارې په پیغام کې ویل شوي، دوی په تېرو دریو میاشتو کې له۱۴۲ زره ډېرو ماشومانو سره مرسته کړي، چې ښوونځیو ته لاړ شي او زدکړې ترلاسه کړي.
د ملګرو ملتونو د ماشومانو صندوق یونیسف له دې مخکې د تېر سپتمبر پر اتلسمه چې طالبانو د هلکانو ښوونځي پرانیستل، یوه بیان کې وویل، په افغانستان کې د نجونو د زده کړې راتلونکې په اړه ژوره اندېښنه لري او وايي د نجونو ښوونځي باید بېرته پرانیستل شي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
په افغانستان کې د طالبانو له واکمنېدو وروسته ښوونځي وتړل شول، چې تر اوسه په کور دننه او د نړیوالې ټولنې له پرلپسې غوښتنو سره سره د متوسطه او لیسې په کچه د نجونو ښوونځي لا هم تړلي پاتې دي.
همدا پرون پنجشنبه په کابل کې د شیعه او هزاره وګړو په هغه غونډه کې چې د طالبانو ملاتړ په موخه رابلل شوې وه، ګډونوالو له طالبانو وغوښتل چې خپل حکومت 'ټولګډونی' کړي او ټولو ښځو د زدکړو اجازه ورکړي.
د طالبانو ویاند مرستیال بلال کریمي له دې غونډې سره هممهاله د طالبانو حکومت اطلاعاتو او کلتور وزارت مرستیال او ویاند ذبیح الله مجاهد له قوله وویل:
''زموږ خویندې دې ډاډ ولري، چې ښوونځي یې پرانیستل کېږي. ''
د ښاغلي کریمي په ټویټر پیغام کې ویل شوي، د دوی حکومت پر داسې میکانیزم کار کوي چې ''له اسلامي اصولو او ملي کټو سره برابر وي او له هغه وروسته به د خویندو ټول ښوونځي او تعلیمي ادارې پرانیستل شي. ''
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
طالبان وايي، دوی د نجونو د زده کړو خلاف نه دي او د ترانسپورټ، جلا ټولګیو، ښځینه ښوونکو او د ستر په برخه کې د شته ستونزو هوارولو سره به د هغوی ښوونځي هم بېرته پرانیستل شي.
بل لور د ملګرو ملتونو ادارو په ګډون د بشري حقونو سازمانونو په افغانستان کې له زدکړو د نجونو محرومیت په هکله اندېښنې څرګندې کړې او د ناوړه پایلو خبرداری یې ورکړی.
د ملګرو ملتونو کلتوري سازمان یونسکو مسوولینو په وینا په ۲۰۰۱ کال کې د نجونو د زده کړو کچه په افغانستان کې ۱۷ سلنه وه خو اوس ۳۰ سلنې ته لوړه شوې وه.
د یونسکو له خوا د خپرو شویو معلوماتو له مخې په ۲۰۱۸ کال کې دوه نیم میلیونه افغان نجونې ښوونځیو ته تللې او ۹ سوه زره نجونو لوړې زده کړې کولې.
