تاجکستان به د اسیا زړه-استانبول بهیر غونډې کوربه وي
د عکس سرچینه، Arg
د اسیا زړه-استانبول بهیر د غړو هېوادونو د بهرنیو چارو وزیرانو نهم کانفرنس د مارچ وروستیو کې د تاجکستان پلازمېنه دوشنبه کې جوړېږي.
د رپوټونو له مخې، د تاجکستان ولسمشر امام علي رحمان او د هغه افغان سیال محمد اشرف غني د پنجشنبې په ورځ ټلیفوني اړیکو کې هوکړه کړې چې دواړه هېوادونه په ګډه د دې ناستې مشري وکړي.
د ارګ فیسبوکپاڼه کې ویل شوي چې ښاغلی غني او مام علي رحمان د دوه اړخیزه اړیکو پر پراختیا، د افغانستان د سولې پروسې او پر سیمه ییزو همکاریو هم وغږېدل:
"همداراز د دواړو هېوادونو جمهوررئیسانو د اقتصادي، سوداګریزو او سرحدي همکاریو په پراختیا ټینګار وکړ. "
د تاجکستان ولسمشر خپل افغان سیال ته د شانګهای همکاریو سازمان د بنسټېدو یا تاسیس ۲۰ کالیزې مراسمو کې د ګډون بلنه هم ور کړې، چې راتلونکې میاشت(مارچ)په تاجکستان کې جوړېږي.
د اسیازړه- استانبول بهیر څه غواړي؟
د عکس سرچینه، ARG
د اسیا زړه- استانبول بهير د ۲۰۱۱م عیسوي کال د نومبر په ۲ د ترکیې استانبول کې د افغانستان او ترکیې په نوښت جوړ شو .
د دې بهیر یوه موخه په افغانستان کې سوله او د دغه هېواد له څنګلوریو ګاوندیانو سره اړیکي دي، چې پکې د ترهګرۍ، نشه يي توکو، نېستۍ او توندلارۍ د له منځه وړلو لپاره لارې چارې لټول کېږي.
د اسیا زړه- استانبول بهير ناستو بله موخه هم د سیمه والو هېوادونو په منځ کې د باور د زياتولو او په پرمختيايي چارو کې د همکاريو غښتلي کول دي.
د افغانستان پر ګاونډيو او سيمه ييزو هيوادونو سربېره روسيه، هند، سعودي او عربي متحده امارات هم د استانبول بهير غړيتوب لري.
د دې بهیر نور غړي
د عکس سرچینه، ARG
دا رنګه د امريکا متحده ايالتونه، برتانيا، د اروپايي ټولنې ځينې غړي هېوادونه او ملګري ملتونه د دغه بهيره ملاتړ کوي.
د اسيا زړه هېواد کنفرانس نور ګډونوال د ناټو، سارک او ملګرو ملتو په ګډون د ١٢ سيمه ييزو او نړيوالو موسسو استازي دي.
تراوسه د دې بهیر درې ناستې(۲۰۱۱، ۲۰۱۸-۲۰۱۹) ترکیه، افغانستان کې پر (۲۰۱۲)، قزاقستان کې پر (۲۰۱۳)، چین کې پر (۲۰۱۴)، پاکستان کې پر (۲۰۱۵)، هند کې پر (۲۰۱۶) او اذربایجان کې پر (۲۰۱۷) کال جوړې شوې دي.
