جنرال مکماسټر: ټرمپ د افغان حکومت پر ضد طالبانو سره ملګری شوی

د امریکا د ملي امنیت پخواني سلاکار جنرال هربرټ مکماسټر د افغانستان په اړه د ولسمشر ډونلډ ټرمپ پر تګلاره سختې نیوکې کړې دي او دا یې د زرګونو امریکایي سرتېرو د قربانیو ضایع کول بللي دي.

نوموړي له امریکایي 'سي‌ بي‌ اېس ' تلویزیون سره په یوه ځانګړې مرکه کې ویلي، ولسمشر ټرمپ د افغان حکومت پر ضد د طالبانو ملګرتیا کوي.

جنرال مکماسټر د سي بي اېس تلویزیون 'شپېته دقیقې ' خپرونه کې ویلي، دی په دې باور دی چې د افغانستان په اړه د ولسمشر ټرمپ اوسنۍ پالیسي ناسمه ده.

ښاغلی مکماسټر په دې مرکه کې زیاتوي:

"زه فکر کوم موږ په افغانستان کې یوې دوامدارې ژمنتیا ته اړتیا لرو،‌ چې د افغان حکومت او افغان امنیتي‌ ځواکونو مرسته وکړو. ځکه دوی دي چې د دې جګړې بار ته یې اوږه ورکړې ده".

د امریکا د ملي امنیت پخوانی سلاکار په داسې حال کې دا څرګندونې کوي چې د افغان دولت او طالبانو پلاوي په دوحه کې په بین الافغاني خبرو بوخت دي.

ولسمشر ډونلډ ټرمپ په ښکاره ویلي چې د افغان حکومت او طالبانو د جوړجاړي په صورت کې به له افغانستانه خپل ټول ځواکونه وباسي.

امریکا او طالبانو تېره فبرورۍ میاشت کې د دوحې خپلمنځي تړون کې هم له افغانستانه د ټولو امریکایي‌ او بهرنیو ځواکونو پر وتلو هوکړه کړې ده.

خو د جنرال مکماسټر په ګډون یو شمېر پخواني او اوسني امریکایي چارواکي‌ په دې باور دي چې ولسمشر ټرمپ له افغانستان د ځواکونو په ایستلو کې بیړه کوي،‌ او دا تګلاره ښایي په راتلونکې کې د امریکا ملي امنیت ته زیان ورسوي.

جنرال مکماسټر په ۲۰۱۷ کال کې د ولسمشر ټرمپ د ملي امنیت سلاکار شو، خو د ۲۰۱۸ کال په مارچ کې یې له دې دندې استعفا ورکړه.

په دوحه کې بین الافغاني خبرې چېرته رسېدلي؟

بل لور ته په دوحه کې د افغان سولې په تړاو د بین الافغاني مذاکراتو د پيل یوه اوونۍ پوره شوه، خو د تمو خلاف په افغانستان کې جګړې او تاوتریخوالی ډېر شو.

د بي بي سي خبریال ندیم اشرف د دغه هېواد د دفاع وزارت چارواکو له قوله وايي، چې امنیتي ځواکونه په فعال دفاعي حالت کې دي خو د طالبانو د بریدونو په ځواب کې یې دغې ډلې ته تلفات اړولي دي.

په ورته وخت کې د طالبانو د قطر دفتر ویاند بي بي سي ته ویلي دي چې په دوحه کې د مذاکراتو تر څنګ به په افغانستان جګړه روانه وي.

له دې وړاندې د دفاع وزارت ویلي وو چې د هېواد په شاوخوا شلو ولایتونو کې جګړه روانه ده. د قطر په دوحه کې د افغان حکومت د مذاکراتي ډلې او طالبانو تر منځ د خپلمنځي خبرو پوره یوه اوونۍ وشوه.

تمه دا وه چې د دغو خبرو له پيل سره به تاوتریخوالی راکم شي.

د افغانستان د دفاع وزارت په تېره یوه اوونۍ کې د بریدونو او تلفاتو په تړاو کره مالومات نه ورکوي، خو د دغه وزارت ویاند روح الله احمدزي بي بي سي ته وویل، طالبانو په بېلا بېلو ولایتونو کې جګړو ته دوام ورکړی دی.

د سولې په خبرو کې د افغان حکومت مذاکراتي ډلې په خپلو څرګندونو کې په وار وار ټینګار کړی چې له طالبانو سره به لومړی پر اوربند خبرې کوي.

خو طالبانو ویلي دي چې له اوربند وړاندې لومړی باید د جګړې پر عواملو بحث وشي. په قطر کې د طالبانو د سیاسي دفتر ویاند محمد نعیم بي بي سي ته ویلي دي چې قطر کې ناستې د همدې لپاره دي چې جګړه ختمه شي.

نوموړی زیاتوي چې د دواړو ډلو ترمنځ لږ ستونزې شته، خو ښايي هغه زر هوارې شي.

دوه ورځې وړاندې د افغانستان د دفاع وزارت ویلي وو چې که طالبان د جګړې له لارې غواړي خپلو موخو ته ورسېږي، دا امکان نه لري.